Hatun malu partidu husi konsolidasaun

Lider partidu politikus balun bainhira hala’o atividade konsolidasaun ho nia militantes sempre koalia buka hatun lideransa husi partidu seluk no halo asaun haleu sidade.
“Hau hanoin ida ne’e sira sala uza, ne’e la’os kampanha para hatun malu entre partidu,” hateten Deputadu Indenpendente Mateus de Jesus, semana kotuk iha Parlamentu Nasional, Dili.

Tuir nia, konsolidasaun ne’e fo edukasaun sivika ba militante sira, nune’e bainhira to’o iha eleisaun militante sira la’o tuir regras ne’ebe mak iha.
“Tanba lider sira koalia hodi hatun fali lider seluk, entaun militants sira mos buka trata militants partidu sira seluk, hau hanoin lideransa partidu sira tenke fo atensaun ba ida ne’e.”
Nia hatutan maske iha kampanha laran, labele hatun ema seluk, maibe oinsa mak ida-idak hato’o sira nia planu programa ba militants sira bainhira sira kaer ukun.
“Se partidus politkus sira hatun malu bei beik bele kria fali konflitu antes tama ba eleisaun 2012,” nia dehan.
Entretantu Deputado Bankada Fretilin Inacio Moreira hateten FRETILIN halo nia konsolidasaun sempre hato’o informasaun ne’ebé mak relevante no aktual .
“Kona-ba trata malu, karik liafuan balun ne’ebé mak ladun di’ak, ne’e kestaun seluk ne’ebé presiza hare para bele hadia, mais agora dadauk ne’e ita nia lei eleisaun ninian seidauk to’o

hanesan ba kampaná eleitoral nian,” nia hateten.
Tanba ne’e, se karik buat balun ne’ebé mak la’o la lós presiza hadia, hodi mantein nafatin ambiente politiku ne’ebé di’ak no respeita malu hodi dezenvolve demokrasia la’o ba oin.
Entretantu tuir Deputadu bankada Partidu Sosial Demokrata (PSD), Mario Viegas Carascalao, objetivu husi konsolidasaun ne’e atu monta estrutura no hato’o programa partidu ida-idak nian, “la os halo konsolidasaun sai fali kampanha hodi hatun malu.”
Tuir nia, so uniku iha Timor mak primeira vez halo kampanha antes tama ba tempu kampanha. “Konsolidasaun ne’e tenke konsolidasaun hodi fó hatene partidu nia ideolojia, partidu nia programa oinsa mak bele manan iha eleisoens, la’os halo fali ba kampanha,” hateten Deputadu PSD ne'e.