- Publika iha: 01 Novembro 2011
Tuir Sekretariu Estadu (SE) hosi Sekretaria Eletrisidade, Agua e Urbanizasaun (SEAU), Januario Pereira, hateten katak dalabarak komunidade sira balun la hetan be mos tanba komunidade balun seluk la iha konsiensia tan kontinua halo kuak kanu be nian.
SE Pereira fo avizu katak horas ne’e dadauk ekipa tekniku sanemaentu kontinua lao hodi identifika fatin sira.
“Los iha Becora neba balun hulan tiha kanu, ita nia ejijensia mak ne’e, ita nia dever ita la kumpri ita hakarak be ne’e ba ita mesak,” hateten SE Januario Pereira iha Parlamentu Nasional hafoin enkontru ho Komisaun G, iha semana kotuk (13/09).
SE Pereira hateten tan katak se karik komunidade kumpri la bele estraga be arbiru mak be iha Dili resin.
“Mas pronto, ida ne’e ami nia responsabilidade, ami nia tekniku sira kontinua lao oinsa para atu hadia. So keta dala ruma ami ba ne’e atu taka,” haktuir SE.
Nia mos hateten tan katak problema nebe mak ekipa tekniku sira hasoru mak dalabarak sira ba hadia tiha kanu be nian wainhira sira fila tiha husi kotuk sobu fila fali deit.
“Ita nia rai desnivel oituan, ba kalkula nebe ita regula hodi be ba ema hotu, ami nia tekniku sira ba bok, balun husi kotuk aperta fila fali.”
Iha parte seluk SE mos hateten katak be mos nebe mak Governu liu husi estadu ba komunidade sira iha distritu maioria uza bomba be.
“Ida ne’e hanesan resposta emerjensia mais agora dadauk ami hare hela oinsa mak ita bele buka fontes iha nebe dada gravitasaun to’o fatin,” nia dehan tan.
Entertantu Deputadu Rui Meneses hateten katak, falta de jestaun mak iha area balun la hetan be.
“Iha be balun hanesan iha Aimutin Comoro neba, iha balun kanu kuak be sai saugate deit maibe la iha ekipa tekniku ida halo espesaun entau be sai iha fatin ida deit iha fatin seluk la hetan be,” Deputadu Meneses dehan.
Nia husu tanba sa mak SE la dezenvolve politika selu be nian.
“Hanesan mos Eletrisidade atu sistema prepagu ka pospagu ne’e kestaun seluk, atu nune’e iha responsabilidade para atu harii nasaun tanba nasaun Timor-Leste la os Governu nian deit,” haktuir Deputadu Meneses.
Alende ne’e Deputadu Inacio Moreira hateten tan katak kompania nebe mak dada be mos maibe kontinua la diak husi Governu halo saida ona ba sira.
“Kuaze iha teritoriu laran tomak halo perfurasaun ba be mos ho osan montante bobot deit maibe be lasai.”
Tuir fiskalizasaun nebe Deputadu Moreira halo iha distritu Maliana, Vila laran, katak, sosa tiha jerador husi deit iha nia aikabelak leten maibe to’o agotra be sidauk sai.
“I laos ida ne’e deit iha Manatutu iha neba Japaun sira halo tiha tau bomp tolu be lao normal hela, ita bot sira ba fura tan nia sorin monta bomba hanesan maibe be la sai.”