- Publika iha: 01 Novembro 2011
Korpo Konsello Popular da Republika Demokratica de Timor –Leste (CPD-RDTL), hala’o asaun pasifika iha Kampu Demokrasia, Dili, tanba lamenta ho serimonia desmobilizasaun ne’ebe halao ba veteranus iha loron 30 Agostu 2011 foin liu ba.
“Ami lamenta teb-tebes kona-ba rekonhesimentu ba veteranus atus rua ualunulu resin ne’ebe simu medalha iha pasacio do governu,” hateten Komisariu Politika Nasional setor dois Baucau, Jose Freitas, iha Kampu Demokrasia, Dili, semana kotuk (4/10).
Komisariu Freitas hatutan katak masas ne’e konsentra iha kuluhun inklui sede CPD_RDTL iha Balide no reprezenta hosi elementus hosi distritu 13 territoria nasional tomak.
“Ami hala’o asaun ne’e loron tolu maibe laiha krime ruma”, hatete Komissariu Freitas.
Kona ba aksaun protestu pasifiku ne’e, Komandante Polisia Nasional PNTL, Distrito Dili, Superintendente Chefe Pedro Belo hateten katak policia iha ona konesimentu kona ba aksau ne’e semana rua antes.
“PNTL autoriza no fo seguransa durante asaun hala’o sen iha krime ruma,” hateten Komandante Pedro Belo.
Hatan ba lamentasaun Grupu CPD-RDTL Primeiro Ministro (PM) Kayrala Xanana Gusmao hatete, desmobilizasaun ba veteranus tuir lei ne’ebe aprova maioria parlamentu Nasional.
“Programa desmobilizasaun ne’e bazeia ba lei, ne’ebe laiha sidadaun ida mak kontra programa ne’e,” hatete PM Gusmao.
Iha okaziaun Primeiro Ministro husu ba CPD-RDTL atu respeitu desizaun ne’ebe fo sai husi Estadu Timor-Leste.