- Publika iha: 31 Outubro 2011
Hafoin Sekretariu Estadu (SE) hosi Sekretaria Eletrisidade, Agua e Urbanizasaun (SEAU), Januario Pereira, no Ministru Infrastrutura, Pedro Lay, Vise Ministru Infrastrutura, Jose Manuel Carrascalao, hamutuk ho nia diretor sira ba iha Parlamentu Nasional halo audiensia konaba ezekusaun Orsamentu Estadu 2011 nian, membru parlamentu balun preokupa konaba konstrusaun Sentral Eletrisidade uza be iha Maukale, suku Gariwai, Distritu Baucau nebe mak Embaisada Noruega kopera hamutuk ho Governu Timor-Leste halo, tanba paradu hela to’o agora.
“Hau hakarak norwegia ninian nia kontinuidade halo nusa, tanba sa mak buat ne’e para estadu la orsamenta,” hateten Deputadu Joaquin Amaral, FRETILIN, iha Parlamentu Nasional, semana kotuk (12/10).
Deputadu Amaral husu tanba sa mak Governu la orsamenta maibe orsamenta bara-barak hola jerador gasta tiha husik deit.
“Ita iha energia renovavel, se nia investiemntu karun, ninia manutensaun sira ne’e sai baratu liu, ida ne’e mos bele kontribui ita nia defisit nebe bele hela besik ita nia komunidade sira,” dehan Deputadu Amaral.
Enkuantu komunidade Graiui Bonifasio da Silva hateten katak, konstrusaun ba sentru eletrifikasaun neba horas ne’e dadauk paradu hela.
“Hau rona katak, horas ne’e dadauk para tiha ona, I hau nia kolega sira mos servisu neba la iha tiha ona,” hateten Bonifacio husi Komunidade Gariwai iha Baucau.
Tuir nia katak konstrusaun sentral eletrisidade ne’e tinan kotuk halo tiha ona inagurasaun maibe tanba udan bot rai iha neba halai mak sobu tiha kanu be nian hodi tama ba Makina nian aat hotu.
Entertantu tuir SE Pereira hateten katak, remata fulan ida ne’e lao fali ona.
“Ami mos preokupa tebe-tebes tanba depois inagura projetu ne’e maibe enfelismente udan bot iha rai neba,rai halai, halo pipa sira ne’e naksobu hotu maibe Norwegia tau matan nafatin, fin do mes lao fali ona,” haktuir SE Pereira.