- Publika iha: 26 Outubro 2011
Planu governu atu loke linha kreditu ba populasaun nudar inisiativa ida atu hamenus ki’ak iha Timor-Leste hetan reseasaun diak hosi komunidade.
Tuir rezident komunidade Delta IV, Margarida dos Santos, ho linha kreditu ne’ebe Banco Nasional de Comércio de Timor Leste (BNCTL) ne’ebe sei fo nudar inisiativa bo’ot atu hadia ekonomia iha ita nia rai laran no mos kreditores bele uza osan ne’ebe sira kredit hodi fila liman no halo atividade seluk.
“Hau sente kontente no haksolok tamba governu iha hanoin no planu ne’ebe furak hodi ajuda fó kreditu ba Timor oan no sira nia rendimentu ekonomia,” hateten Komunidade dos Santos.
Manager Credito hosi BNCTL, Marcelo da Cruz Carvalo, hateten semana kotuk (6/10) katak banku ne’e sei oferese kreditu ba sosiedade hodi hamenus ki’ak iha Timor Leste.
“Ami Nia misaun [BNCTL] mak atu fo asistensia ba komunidade ne’ebe laiha relasaun ho banku no hanoin ou matadalan ida oinsa atu tau osan hamutuk hodi dezenvolve moris komunidade nian ne’ebe fraku iha Timor-Leste,” hateten Manager Credito da Cruz.
Elvira Marçal, kreditora hateten katak kreditu nia hetan hosi BNCTL ajuda nia moris.
“Hau nu’udar kliete ida ne’ebe hetan kreditu iha BNCTL sente kontente tamba bele ajuda ita hodi fila liman hosi buat barak hanesan wainhira atu fila liman modal la to’o entaun ita bele kredit hodi aumenta modal,” hateten Marçal.
Iha fatin hanesan, funsionariu BNCTL Jose Cristovão Pires hateten prosesu ne’ebe sira uza mak oinsa atu fó hatene ba kliente sira kona ba oinsa atu hetan kreditu.
Jose dehan ba ema ne’ebe hakarak hetan kreditu iha BNCTL tenke kompleta dokumentus ne’ebe sai hanesan criteria fundamental banku hanesan kartaun eleitoral fen no laen, foto, surat deklarasaun hosi testamuña, deklarasaun hosi komersial se karik iha, halo survey ba fatin.
“Difikuldade ne’ebe ami infrenta mak hanesan estrada porque wainhira ami ba halo sosializaun klientes barak hela liu iha suku izoladu lahetan asesu ba Estrada ka informasaun tamba ne’e ami tenke lao ain ho distansia ne’ebe do’ok hodi ba hasoru klientes sira,” hateten staff Pires.
Entretantu tuir Presidente Komisaun C Parlamento Nasional, Deputado Manuel Tilman, hateten BNCTL ne’e loke ona iha distritu sanulu resin tolu (13) hodi fasilita povu atu foti osan hosi ne’eba.
“Hau apaoiu tebes inisiativa ida ba BNCTL ne’e tamba bele fasilita funsionariu ne’ebe hela iha distritu bele simu iha ne’eba de’it labele lao to’o Dili inklui mos funsionariu ferik ho katuas ona,” haktuir Deputado Tilman.