- Publika iha: 26 Outubro 2011
Traballadores Timoroan lamenta ho programa governu nian ne’ebe haruka traballadores estrajeiros mai servisu iha Timor-Leste tanba fó impaktu negativu ba traballadores Timoroan liu liu juventude dezempregadu.
“Ami sempre hasoru difikuldade iha ami nia moris tamba ne’e ami nu’udar sidadaun Timor-Leste ami mos iha direitu atu hetan servisu maibe susar tebes mai ami servisu” hateten, Sonio da Silva, hanesan komundade iha ninia hela fatin Becora, Dili, semana kotuk.
Tuir Sonio traballadores estranjeiro ka hosi rai liur ne’ebe mai servisu ona iha Timor nia numeru aas no sira alega katak ida mak halo populasaun barak labele hetan servisu.
“Nu’udar komunidade ne’ebe hela iha cidade ami sempre servisu maka’as atu hetan osan oituan hodi fó eskola ba ami nia oan sira, maibe osan ne’ebe ami hetan lor-loron mos minimu liu atu sustenta ami nia vida,” hateten Sonio.
Nia apela ba governua Timor-Leste atu loke tan kampu de taballu barak hodi nune’e populasaun mos bele hetan oportunidade atu bele servisu tuir sira nia kapasidade hodi bele sustenta nesesidade ba moris lor-loron nian.
“Hau la kontente wainhira hare joven barak la hetan servisu hanesan traballadores husi rai liur ne’ebe mai servisu iha Timor-Leste” hateten Salvador da Cruz, nudar trabalhadora Timoroan ida.
Trabalhador da Cruz mos apela ba governu bele toma atensaun mos ba maluk sira ne’ebe mak seidauk hetan servisu no karik bele loke tan fatin servisu hodi sira fómos kontribuisaun ba dezenvolvimentu Nasional.
Kona ba keixas hosi trabalhadores ne’e tuir Deputadu Inacio Moreira sentimentu komunidade ne’e justifika aprovasaun lais ba Lei Trabalhu nian ne’ebe oras ne’e dadauk diskuti hela iha Parlamentu Nasional.
“Nu’udar parte husi governu, prezisa aprova lalais Lei Trablladores tamba prezisa iha regulamentu ida atu regula traballadores iha Timor-Leste” hateten Deputadu Moreira.
Iha parte seluk Deputadu ne’e mos husu ba traballadores Timoroan tomak atu prepara an didiak, bainhira servisu iha kompania ka impresa ruma tenke ho responsabilidade.