MTCI IAE fulan fulan intervene ba sasan faan liu ona prazu

Maske Ministerio Komersio e Industria (MTCI) liu husi Diresaun Inspesaun Alimentar Ekonomia (IAE) sempre hala’o intervensaun ba sasan ne’ebe liu ona prazu, loja nain balun sei kontinu nafatin faan sasan liu ona prazu no tau komunidade nia saude iha perigu.
“Hau husu ba governu liu husi MTCI kada fulan tenke hala’o kontrola ba iha lozas ou supermarket sira hodi haree ba sasan ne’ebe balun liu ona prazu,” hateten komunidade Abelita Brito kona ba sasan nia haree faan iha loja maibe nia prazu liu ona.
Komunidade ne’e nia tauk mak ema ne’ebe sasa no han sasan liu ona prazu bele hetan estragus ba nia no nia familia nia saude.
Hatan ba preokupasaun ida ne’e, Sub-Inspector Jeral IAE, [naran], hateten, “ami hala’o intervensaun kada fulan ba iha lozas sira iha Timor laran tomak no ami sempre prende ona sasan ne’ebe liu ona prazu, sura lolos iha lozas lima mak kontinua fa’an sasan liu prazu,” nia hateten iha servisu fatin iha Mandarin, Dili, semana kotuk.
Tuir Sub-Inspector ne’e, sasan ne’ebe mak liu ona prazu, fofoun sira prende uluk iha loza Sigma Unipesoal Lda., Jacinto, Beter, Lita Supermarket, Land Mark Plaza, Lum Unipesoal, Club Predikal no loja seluk iha rai laran. Sasan balun ne’ebe ekipa inspeksaun alimentar hetan ho prazu liu mak hanesan Sprite, Beer ABC no hetan beer Tiger 10 ka 20 kaixas.
Sansaun ne’ebe mak sira foti hasoru loja nain sira mak sira tenke selu multa $10.000 ida idak. Iha future katak loja hanesan mak la kumpri no hakarak kontinua fa’an sasan liu prazu hela deit sei bele hetan sansaun aas tan no bele to’o $50,000.
Sansaun aplikavel ba lojas faan sasan liu prazu bazeia ba regulamentu Numeru 23/2009 ne’ebe vigora iha Timor-Leste kona-ba rejime infrasaun administrativa kontra ekonomia seguransa alimentar.
Kona ba sasan liu prazu mak prende sei rai hamutuk iha armazem MTCI atu tuir mai soe ba iha fatin lixu Tibar.
Iha parte seluk tuir Prezident Komisaun F, ne’ebe toma konta ba assuntu Saude, Parlamentu Nasional, Deputadu Virgilio Diaz Marçal, hateten katak sasan liu prazu barak mak oras ne’e sei fa’an hela iha lojas sira no ema ne’ebe ba hola la hare entaun bele afeta ba sira nia saude.
“Ami halo ona lei ne’ebe atu regula buat sira ne’e maibe ida ne’e ministeriu kompetente sira mak tenke kontrola ba sasan liu prazu tanba se la’e bele estraga ema nia saude hodi hetan moras, importante mak halo kontrola ka intervensaun,” hateten Deputadu Marçal.