- Publika iha: 14 Outubro 2011
Membru Parlamentu Nasional lamenta ho kanselamentu eleisaun jeral 2012 ne’ebe sei hala’o ba sidadaun sira ne’ebe hela iha estranjeiru tanba parte rua Parlamentu no Sekretariadu Tekniku Administrasaun Eleitoral (STAE) konkorda ona hodi halo eleisaun iha liur.
“Ministru ho nia Diretor tur iha ne’e sira simu, katak bainhira Parlamentu aprova tiha lei eleitoral, sidadaun Timor-leste ne’ebe hela iha estranjeiru bele tuir votasaun maibe agora sira kansela, tanba sa?,”kestiona Deputadu Francisco Jeronimo, semana kotuk (27/09) iha Uma Fukun,Dili.
Nia parte lamenta tanba Parlamentu konsege aprova tiha lei eleitoral ba sidadaun sira iha liur bele tuir votasaun iha eleisaun jeral tinan oin.
“Prezidenti da Republika mos agora dehan labele e husu ba parlamentu atu kansela ,ita halimar fali sasan sira ne’e ,iha momentu iha ne’e ita diskuti hotu-hotu dehan bele, ikus fali mai dehan labele fali ona,”nia preokupa.
Lamentasoens hanesan mai husi Deputada Josefa Alvares Soares,ne’ebe lamenta kona-ba kanselamentu eleisaun iha rai liur.
“Hau admira teb-tebes senhor Diretor STAE rasik mak mai tur iha ne’e halo audensia publika aprova tiha osan ,dehan sim senhor maibe agora nia mak komenta tebes dehan eleisaun ne’e labele halo,iha saida husi kotuk ne’e,” Josefa lamenta.
Enkuantu tuir Deputadu Pedro da Costa Martires katak, eleisaun labele hala’o iha estranjeiru tanba kapasidade ne’ebe sei minimu.
“La iha kapasidade ita atu implementa ne’e normal ,depende ba kapasidade ita nian, depende ba rekursu humanus no perparativu ne’ebe ita iha,” nia dehan.
Tuir nia, maske aprova ona lei maibe laiha kapasidade, labele obriga aan atu implementa eleisaun iha rai liur “ne’e ita nia kakutak laloos ona,tenke hare tuir ita nia kbi’it,” nia tenik.