- Publika iha: 14 Outubro 2011
Jose Cristovão Pires, nudar residente komunidade iha Tasi-tolu, Dili, sentin triste tanba kuru be’e distansia ne’ebe do’ok no maske ejizensia ne’e hato’o dala barak ona ba Governu, liu-liu parte Sentru Aguas no Saneamentu (SAS) maibe sira nafatin la asesu nafatin ba be’e mos.
“Hau sente kole, isin moras, triste wainhira kuru be’e ho distansia ne’ebe do’ok. Dala ruma atu ba servisu ka alin balu atu ba eskola mos tarde no halo atividade mos ladi’ak,” hateten Sr. Pires, iha nia hela fatin Tasi-tolu, semana kotuk (22/9).
Nia hatutan liu katak rezidentes iha nia bairo hato’o prekupasaun ne’e dala barak ona tan ne’e husu ba ukun nain sira tau matan ba povu ki’ik sira.
“Ami mos husu ba governu atu bele tau matan mai ami nia difikuldade ne’ebe mak ami hasoru, tanba ami mos povu ba rai ida ne’e nian. Labele presiza de’it ami wainhira tempu eleisaun, maibe hare’e mos ami nia terus,” tenik Sr. Pires.
Hatan kona ba preokupasaun ne’e Diretor SAS, Cerco do Amado, hateten katak kanalizasaun be’e mak sirkula iha Dili laran ne’e liu ho nia prosesu no katak diresaun SAS sei kontinua hahu nia servisu ba area ne’ebe mak hetan difikuladade asessu be’e mos hanesan Kakaulidun, Manliuana, Komoro no Tasi-tolu.
“Hau husu ba komunidade sira ne’e mak la asesu ba be’e mos hanesan area balu ne’ebe mak identifika ona katak ita tenke iha kolaborasaun no hola partisipasaun ne’ebe ho konsensia atu nune’e SAS nia servisu bele lao ho di’ak no bele fo benefisiu ba komunidade ne’ebe mak falta be’e mos,” hateten Diretor SAS do Amado.
Iha parte seluk tuir Albino do Rozario hateten nia sente triste wainhira hare’e maluk balu la asesu ba be’e mos hodi halo sira nia atividade loron-loron nian.
“Hau husu ba Governu toma responsabiliza liu-liu parte SAS atu halo kanalizasaun be’e tornera be’e mos ba maluk sira ne’ebe la asesu be’e mos tanba be’e mak sai hun no rohan ba ema nia moris,” hateten Sr. do Rozario.