- Publika iha: 07 Outubro 2011
Atu hare no konese diak liu tan fatin historiku hodi sulan prizioneirus politikus sira durante 24 anos nia laran, membru Asembleia Parlamentar Komunidade Paizes da Lingua Portugues (AP-CPLP) halo vizita ba CAVR Balide,Dili.
Tuir Diretor CAVR/CVA Agostinho de Vasconçelho katak objetivu principal husi vizita ida ne’e mak atu sira iha konesementu diak liu tan kona-ba prosesu luta Timor nian durante 24 anos nia laran to’o hetan ukun rasik aan.
“Tanba ita bo’ot sira hatene katak,fatin ida ne’e parte ida luta desde Portugues nia tempu fatin ne’e sai hanesan kadea ba ema prizoneirus politikus,” hateten Diretor Agostinho de Vasconçelho,semana kotuk (20/09) hafoin simu vizita husi membru Asembleia Parlamentar CPLP nian, Balide,Dili.
Na hatutan, fatin ne’e la’os deit iha okupasaun Indonezia nian maibe mos desde okupasaun POrtugues nian hodi sulan prizioneirus polikus sira iha fatin ne’e.
“Depois ita ukun an tiha CAVR hili ninia fatin hanesan baze hodi halo nia atividades rekolla informasoens kona-ba konflitu pasadu, “Agostinho konta.
Nia dehan ,Timor ukun an tiha fatin ne’e la’os on kadea maibe fatin ne’e agora sai fatin memoria ida e ema hotu-hotu vizita fatin ne’e tanba fatin ne’e terus fatin.
“Tanba ne’e mak sira mai iha ne’e hakarak hare deit no hatene kona-ba servisu CAVR nian no mos simplismente sira hakarak hatene fatin terus ida ne’e ninian,”Abrao informa.
Entertantu Margarida Talapa, Xefe delegasaun Asembleia Parlamentar husi Moçambique hateten objetivu husi vizita ne’e atu bele iha konesementu kona-ba fatin historiku sira ne’ebe iha Timor.
“Entaun ida ne’e hanesan esperiensia ida ba ami bele hatene kona-ba situasaun real ne’ebe mak akontese iha Timor-leste iha tempu pasadu,” Talapa dehan.
Kona-ba monument Amo Papa nian ne’e sai hanesan fatin faktus historiku ba luta libertasaun Timor nian.
“Hau hanoin ida ne’e refleta duni ba jerasaun foun Timor-leste nian no sai hanesan referensia ida hodi konkista ba ita nia independensia,”nia katak.