- Publika iha: 30 Setembro 2011
Maske Eskola Primaria Samoro,Suku Foho Rai Ki’ik, Sub-distritu Maubesi distritu Ainaro anin sobu desde Marsu 2011, maibe to’o agora governu seidauk hadia no alunus sira kontinua estuda iha liur.
Tuir Deputadu Paulo Fatima Martins katak Ministru Edukasaun, Superintendenti inklui staf sira hotu dukur tanba eskola ne’e anin sobu kleur ona maibe seidauk iha rehabilitasaun.
“Hau sente seidauk iha medidas konkreta kona-ba situasaun escola ida ne’ebe iha Samoro Maubessi nian ne’e maske hau foti ona dala rua iha Parlamentu ne’e maibe seidauk iha asistenti ruma ba esccola ne’e,”hateten Deputadu Paulo Fatima Martins ,semana kotuk ( 17 /08 ) iha Uma Fukun Dili.
Maske nia rasik sei to’o iha fatin ne’e, maibe tuir informasaun ne’ebe nia simu via telephone husi parte eskola nian katak seidauk halo buat ruma ba eskola ne’e tantu husi distrital no nasional.
Entretantu hatan ba kestaun ne’e, Diretor Nasional do Ensino Baziku,Alfredo de Araujo katak ne’e kazu emerjensia nian no preiza halo levantamentu dadus, dokumentus apropriadu hanesan material tenke akumula “Ita resolve uluk atu oinsa mak labarik sira ne’e tuir prosesu aprendizajen ho seguru,”.
“Tanba konstrusaun ne’e la fasil, lori tempu ne’ebe naruk, la’os hanesan ita koalia ne’e liu husi birokrasia laia eskola ida ohin anin sobu aban harii fila-fali, ne’e laiha,”nia responde.
Nia hatutan,antes rehabilita eskola ne’e presiza identifika lai kazu ne’e tanba sa, fatin ne’e sufisiente ka la’e se halo fali kontrusaun iha fatin ne ‘ebe la dun sufisiente aban bainrua monu fila-fali deit ne’e halo nusa.
“ Ne’e presiza estudu ida ne’e la fasil ne’e presiza lori tempo para atu halo analiza depois mak bele halo konstrusaun,” nia tenik.