- Publika iha: 26 Setembro 2011
Prezidente Komisaun C Parlamentar, Deputadu Manuel Tilman hateten Autoridade Bankaria de Pagamentu (BPA) sei transforma ba Banku Sentral (BS) Timor-leste nian iha fulan ida ne’e.
“Iha dia 13 Setembru agora, BPA transforma ba Banku Sentral,”hateten Deputadu Manuel Tilman semana kotuk (05/09) iha Uma Fukun PN.
Kona-ba se mak atu sai governador no vise governador ba BS nian, depende ba governu tanba governu mak sei nomeia sira.
“Hau hanoin primeiru Ministru mak sei nomeia governador no vise governador ba iha Banku Sentral nian, maibe karik seidauk nomeia, Dr.Abrao Vasconçelho mak kontinua nafatin hanesan Diretor ka Governador Jeral banku sentral nian,”nia dehan.
Entretantu tuir Deputadu Aderito Hugo husi bankada CNRT,katak nia parte seidauk hatene informasaun lolos kona-ba transformasaun BPA ba BS.
“Bele fulan ne’e,bele mos fulan tolu oin mai tanba iha lei banku sentral nian hateten, depois halo publikasaun iha jornal republika, nia efetividade komesa loron hira, trinta ou noventa dias,”nia dehan.
Tuir nia, BPA harii husi governu tranzisaun ONU nian ne’ebe lolos hala’o nia papel hanesan Banku Sentral, so ke estatuta mak seidauk.
“BPA nia estatutu sai Banku Sentral mak seidauk maibe iha tan kriasaun unidade sira bolu FIU (Financial Inteligence Unit) atu kontrolu kona-ba sirkulasaun orsamentu iha rai laran mos iha rai liur atu nune’e prevene osan ilegal iha rai laran,”Aderito tenik.
Iha fatin hanesan Deputadu Francisco Branco husi bankada Fretilin hateten lei banku sentral hein atu implementa deit tamba lei ne’e rasik aprova tiha ona Parlamentu no promulga tiha husi Prezidenti da Republika.
“Hau hanoin bele ona implementa iha semana ida ne’e nia laran,se lae semana oin,” dehan deputadu Francisco Branco.