Implementasaun PDD distritu Viqueque diskunfia KKN

Membru Parlamentu Nasional preokupa ho implementasaun Projetu Dezenvolvementu Desentralizadu (PDD) iha Distritu Viqueque tanba diskunfia pratika Korupsaun, Kolusaun no Nepotismu (KKN).
“Ami simu informasaun husi emprezariu sira iha distritu Viqueque katak implementasaun projetu ne’e halo diskriminasaun ba sira tanba emprezariu sira ne’ebe hetan tiha projetu ne’e kontinua hetan,enkuantu sira ne’ebe lahetan nafatin la hetan,”informa Deputadu Natalino dos Santos, semana kotuk (05/09) iha plenaria PN.
Tuir nia, bazea ba informasaun ne’ebe simu husi emprezariu sira ne’e katak asina kontratu ba projetu ne’e halo sub-subar deit. “Sira asina kontratu iha loron Sabadu ka loron feriadu deit, la’os iha loron servisu nian, entaun ida ne’e KKN ona,”nia dehan.
Tanba ne’e nia parte husu atu hare asuntu ne’e ho ekilibru, nune’e emprezariu local hirak ne’e bee partisipa direitamente iha dezenvolvementu iha sira nia distritu.
Entretantu Deputadu Arao Noe ne’ebe hetan mos informasaun hanesan husi emprezariu local iha distritu Viqueque katak iha manipulasaun barak ba implementasaun projetu PDD ne’e.
“Diskunfia iha manipulasaun ba projetu ne’e,emprezariu sira ne’ebe lahetan projetu ne’e, sira protes e seidauk hetan solusaun maibe administrador bolu tiha ona kompania sira ne’e asina tiha kontratu ne’e,”nia dehan.
Nia hatutan, kona-ba protesta ne’e komisaun sei halo revizaun ba kontiudu  protestu ne’e.“Depois ami enkamina ba ministeriu Estatal hodi foti desizaun  tanba sira mak iha kompetesia atu hare asuntu ne’e.
Entretantu bainhira jornalista koko konfirma asuntu ne’e ba iha Ministru Administrasaun Estatal Ordenamentu du Teritoriu (MAOET) Arcangelo Leite maibe lakonsege tanba ministru laiha fatin.