- Publika iha: 26 Setembro 2011
Hari Banku Nasional Dezenvolvementu Investimentu (BNDI) ne’ebe membru Parlamentu Nasional diskunfia bolu malu deit, maibe Ministru Ekonomia Dezenvolvementu (MED) ne’ebe hanesan komisariu ba banku ne’e rezeita informasaun ida ne’e tanba la los.
“Ne’e lal los, liafuan falsu. Ami agora dadauk seidauk iha enkuadramentu legal e estatutu mos seidauk prepara,”responde MED,Joáo Gonçalves semana kotuk (07/09) iha Uma Fukun Dili.
Ministru hateten, planu asaun ne’ebe mak sei implementa iha BNDI ne’e sei iha Konsellu Ministru e nia mak sai asionista sira nian.
Nia hatutan,BNDI laiha komisariu maibe iha deit membru konsellu administrasaun no membru ezekutivu deit.
“Membru konselu administrativu,membru ejekutivu depois enkuadramentu legal pronto hotu mak foin hili,ne’ebe agora seidauk realize tanba sei iha faze implementasaun planu de asaun,” nia dehan.
Entertantu tuir Deputadu bankada Fretilin Inacio Moreira katak, harii BNDI ne’ebe diskunfia hili malu deit ne’e hare hanesan ironis liu.
“Ministru ida hili nia an para sai fali komisariu atu ba halo aprezentasaun iha Konsellu Ministru para aprovasaun no sai iha jornal da republika,”Moreira kritika.
Tuir nia, agora TL seidauk presiza harii BNDI maibe karik iha future tanba lakleur tan BPA sei transforma ba Banku Sentral. “Iha future bele harii maibe tetu didiak, tanba hari banku nasaun ninian, iha ema ida rua nia interese iha laran, ne’e sai problema bo’ot,”nia katak.