Suku Comoro Deklara Área La-Soe Foer-Boot Arbiru

Jerente Programa Saúde inan no oan iha Fundasaun Alola, Jose Sabino Ximenes dehan, komunidade sira iha Suku Comoro deklara ona katak Área La-soe Foer-boot Arbiru (ALFA).

"Ohin iha Suku Comoro komunidade hotu-hotu deklara ona (ALFA) Área la Soe Foer Boot Arbiru," hatete Jerente Programa Saúde inan no oan iha Fundasaun Alola ba jornalista sira iha sede Suku Comoro, Díli.

Nia dehan, durante ne’e Suku Comoro seidauk hatene saida mak ALFA, tanba ne'e ekipa ida husi Fundasaun Alola servisu hamutuk ho pesoal saúde sira hodi halo advokasia hodi fahe informasuan ikus komunidade sira komprende no sira mós deklara ona katak iha Suku Comoro mós Area ne'ebé la Foer-boot Arbiru.

Iha fatin hanesan, Xefe Suku Comoro Eligio Jose da Silva Marçal, esplika, Suku Comoro iha Aldeia sanulu resin haat ne’ebé deklara ona ALFA (Área La-soe Foer-boot Arbiru), tanba komunidade iha ona konsiénsia hodi halo rasik ida-idak nia sintina.

"Suku Comoro iha aldeia 14, husi aldeia 14 ne’e deklara ona ALFA, tanba ne’e ba oin ami Suku Comoro sei livre husi área la-soe foer-boot arbiru, la haluhan mós ami agradese ba UNICEF ho Ministériu Saúde hodi halao ona programa ida-ne’e," nia Informa.

Nia hatutan, suku Comoro iha uma-kain 10000 ital, sira deklara ona ALFA, no komprede ona saida maka ALFA.

"Uluk ita-nia komunidade la komprende saida mak fatin soe foer, maibé ohin loron komunidade komprende ona saida maka ALFA,” nia haktuir.

Nune’e mós, Komunidade Comoro Olandina do Santos dehan, ambiente ne’ebé moos no ijiéniku nu’udar xave importante ba moris saudável.

"Tanba ne’e ita presiza ema hotu nia konsiderasaun hodi halo asaun prevensaun, atu reforsa liutan no presiza mós estratéjia ne’ebé forte hodi bele transforma kulturál moris komunidade nian ba Saneamentu Báziku," nia afirma.