- Publika iha: 25 Novembro 2024
Governu Estadus Unidus ho Governu Timor-Leste halo lansamentu ofisial ba Sistema Saúde ho Kualidade Integradu (IHSA), ho objetivu atu hadia ambiente ne'ebé permite servisu saúde sira atu sai ekuitativu no sustentavel.
Nia dehan, USAID nia atividade ba sistema integradu ho investimentu hamutuk miliaun $17 ho objetivu atu hadia ambiente ne’ebé permite servisu saúde sira atu sai ekuitativu no sustentavel.
Nia esplika, atividade ba sistema integradu ne’e sei atinji liu husi dezenvolve no implementa politika asegura finansiamentu saúde ne’ebé adekuadu no previzivel hadiak administrasaun no responsabilizasaun governu nian no promove advokasia bazeia ba evidensia hodi promove prátika diak sira.
“USAID nia atividade ba Sistema Integradu Saúde ne’e, sei apoia esforsu Governu Timor- Leste atu garante asesu ne’ebé sustentavel inkluzivu ba sistema saúde ho efisiente ekuitativu no kuidadu saúde ho kualidade aas hodi hatan ba nesesidade povu timoroan nian,” hatete Embaxadora EUA, Donna Ann Welton liuhusi nia deskursu iha Hotel Timor, Dili.
Nia hatutan, Estadus Unidus nafatin dedikadu atu apoia Timor-Leste nia dezenvolvimentu partikularmente iha setór saéde no setor vitál sira sleuk.
“Ami sente orgullu atu hamriik hamutuk ho povu Timor-Leste hodi harii nasaun ida ne’ebé saudavel no ami mós sei nafatin apoia Timor-Leste iha seitór saúde.
Iha tinan tolu oin mai, USAID sei kolabora ho Ministeriu Saúde, Institutu Nasional Saúde Publika Timor-Leste, sei kolabora ho Autoridade Munisipiu sira, organizasaun sosiedade sivil, no asosiasaun profisional saúde sira nodi hasae kualidade kuidadu saúde primariu ne’ebé Sentradu ba pasiente, planeamentu familiar no saúde reprodutiva, saúde inan, kosok-oan, bebé foin moris, labarik, no adolexente no programa nutrisaun nian,” nia deklara.
Nia informa, sei foka ba hametin governasaun saúde ne’ebé efetivu no mekanizmu finansiamentu ne’ebé efisiente, fornese apoiu tékniku hodi hamosu no utiliza informasaun ne’ebé konfiavel ba foti desizaun, hasae kapasidade jestaun iha rekursu umanu, no hadia demanda ba servisu saúde.
"Ita-nia atividade sira ne’e sei implementa iha nivel nasional no iha munisipiu selesionadu sira liuhosi USAID nia projetu Promoting Results and Outcomes through Policy and Economic Levers (PROPEL). Atividade ne’e implementa husi konsorsiu ida ne’ebé lidera husi Palladium, ho koordenasaun ho parseiru lokal sira," nia hatutan.
Iha fatin hanesan Vise-Ministru ba Operasionalizasaun Ospitál Flávio Brandão Mendes de Araújo, agradese ba USAID ne’ebé durante suporta Ministeriu saúde atu hametin sistema saúde ne’ebé integardu alina ho programa Governu nian.
“Entaun atividade sira-ne’e atu haforsa sistema saúde hodi fó rezultadu ne’ebé di’ak, atu nune’e saúde bele iha kualidade no eleva iha nivel jestaun no atendimentu nian,” nia afirma.