- Publika iha: 04 Junho 2024
Institutu Nasionál Estatístika Timor-Leste (INETL) hamutuk ho parseiru dezenvolvimentu Naçõens Unidas sira, halo lansamentu ba relatóriu sensus 2022 ho temátiku neen (6) mak hanesan Fertilidade, Mortalidade, Edukasaun, Idade, Seksu no seluk tan.
Prezidente INETL, Elias Freitas hateten husi sensus ne’e iha produtu 4 mak konsegue publika ona, primeiru publika ona preleminariu sensus novembru 2022, segundu relatóriu finál publika iha maiu 2023, terseiru relatóriu temátiku sensus populasaun uma kain 2022, ikus liu mak sensus fó fila fali.
“Sensus fó fila fali ne’e ita sei lansa iha fulan oin iha nivel nasionál to’o postu administrativu sira. Dadus ne’e ita foti husi populasaun nune'e dadus ne’e ita fó fali ba sira atu sira bele halo planu iha kada suku, nune’e bele mai hodi halo planu ne'ebé di'ak ho nune’e ita bele atinji duni saida mak mehi husi suku ida-idak,” nia dehan iha salaun Ministério Finansas, Aitarak Laran, Díli.
Nia hatutan, iha sensus fó fila fali ne’e iha indikadór 12 ne’ebé mak liga ba edukasaun, saúde, eletrisidade, bee moos no seluk tan, ho ida-ne’e bele kompara ho sensus 2015, ho dezafiu ne’ebé hasoru ho avasus ida ne’e hodi nune’e bele hodi halo planu ba orsamentu OGE 2025 bele ona planeia tuir dadus ne’ebé iha.
Iha sorin seluk, Ministra Finansas (MF) Santina Cardoso hateten, Timor-Leste iha kompromisu polítiku atu implementa Ajenda Global ba Objetivu Dezenvolvimentu Sustentavel 17 (ODS), tanba ne'e relatóriu hirak-ne'e hatudu ona iha tempu ne'ebé di'ak ho indikadór sira ne'ebé sei sukat progresu ne'ebé halo ona. Dadus hirak-ne'e sei fó mós progresu iha implementasaun Planu Estratéjiku Dezenvolvimentu Nasional (PEDN)2011-2030 maibé mós planu estratéjiku setór oioin ba saúde no edukasaun.
“Governu halo ona investimentu barak iha setór saúde hodi fornese servisu saúde seksuál no reprodutiva, nomós Ministériu Saúde ho nia parseiru sira sei bele halo revizaun ba planu sira uza indikadór sira ne'ebé aprezenta ona ba kada munisípiu.” Nia dehan.
Nia mós husu ba ministériu, governu, departamentu, administradór munisípiu no parte interesada hotu atu uza informasaun sira-ne'e iha relatóriu temátiku sensu nian ba planeamentu dezenvolvimentu iha setór oin-oin.
Iha parte seluk, reprezentante Koordenadór ONU, Bilal Aurang Zeb Durrani hateten, relatóriu sira-ne'e kobre área krítiku sira kona-ba Fertilidade, Mortalidade, Migrasaun, Edukasaun, Projesaun, Avaliasaun ba Idade no Seksu, no sei util atu hatan ba prioridade sira ne'ebé deskreve ona iha planu dezenvolvimentu nasionál sira, inklui asuntu populasaun emerjente sira.
“Nu'udar família Naçõens Unidas nian, ami sente orgullu atu parseria ho Governu hodi suporta esforsu hotu-hotu ne'ebé ajuda halo dadus disponivel ba planeamentu dezenvolvimentu no halo polítika, ho nune'e, ha'u mós rekoñese liuliu papél UNFPA nian iha koordenasaun análize relatóriu neen hotu-hotu ne'ebé lansa ona, nomós UNICEF ba apoiu finanseiru hodi suporta análize edukasaun nian,” nia dehan.