Quinta, Junho 13, 2024
Total visitors: 766366

Konselho de Imprensa (KI) Timor-Leste realiza dialogu kona-ba jornalista ambiental, tanba liu husi dialogu bele fanun jornalista sira no entende liutan kona-ba asuntu ambiental sira ne’ebe afeta Timor-Leste no mós mundu tomak.

Konselho de Imprensa (KI) Timor-Leste realiza dialogu kona-ba jornalista ambiental.

Prezidente KI nian, Otelio Ote, dehan liuhusi dialogu refere konvida oradór internasional sira hodi bele fahe sira-nia esperiénsia no maneira saida deit mak sira uza iha redasaun kona-ba jestaun ba kobertura, hakerek no divulga notísia ba públiku kona-ba asuntu ambiental no maneira protesaun ba jornalista sira bainhira halo kobertura ambiental.

Nia dehan, asuntu ambiental ne'e la’ós de’it ba rai monu, mota tun, udan, maibé koalia mós kona-ba ema okupa área ambiente sira ba sira-nia indústria no sira la gosta media atu tau atensaun kobertura ba área sira-ne'e.

"Ita realiza dialogu ida ne'e atu bele fanun jornalista sira bele sensivel liután hodi halo kobertura ba asuntu ambiental," Prezidente KI Ote dehan.

Nia dehan, kona-ba asuntu ambiental ne'e jornalista sira tenke halo kobertura komesa hahu to remata ezemplu hanesan rai monu ne'e nia impaktu husi ne’ebé, no oinsa atu bele prevene, maibé ida-ne'e jornalista sira seidauk halo.

Iha fatin hanesan, Embaxador Ambiental Ego Lemos dehan krize ambiental, media iha papel importante nian hodi divulga informasaun ba komunidade.

"Iha ita-nia rai iha iha problema barak liu-liu liga ho lixu, ahi han, rai monu, no seluk tan, atu labele tesi ain no sunu duut ka soe foer arbiru, tanba ne'e [kauza] impaktu ba ambiente," nia dehan.

Nia salienta tan katak, ema hotu prontu apoiu Estadu atu bele kontribui saida mak bele, hodi hatan ba redús impaktu husi krize ambiental liuhusi papél media nian.

Entretantu, Jornalista Cesario Cunha dehan, asuntu ambiental ne'e loos katak importante duni ba jornalista sira halo kobertura no publika hodi eduka komunidade sira hodi bele halo redusaun ba impaktu ambiental.

"Jornalista sempre halo ida-ne'e maské la maioria, maibé ita-nia komunidade sira mós la iha konsiénsia, sira nafatin sunu duut arbiru, tesi, soe foer arbiru nafatin," nia dehan.

Tanba ne'e nia dehan, papél jornalista ba redusaun impaktu ambiental ne'e importante, maibé komunidade mos tenke iha konsiénsia atu labele halo buat sira ne’ebé mak kontribui ba krize ambiental.