MS-Sei Tau Atensaun Ba Bee Agua No Galon Ne’ebé Faan Iha Loja

Diretora Nasional Edukasaun Promosaun Edukasaun Saúde, iha Ministériu Saúde, Emilia de Jesus Alves Mendonça hateten, Ministerio Saúde (MS) sei tau atensaun ba bee aqua no galon ne’ebé faan iha loja sira.

Nia dehan, emprezária sira buka de'it lukru hodi hariku sira-nia an, maibé bee ne’ebé sira halo la iha kualidade, no hodi fó impaktu ba ema ne’ebé konsumu no fó risku ba saúde públiku no ema seluk nian. Hani haktuir katak ida-ne’e la bele akontese.

“Ministériu Saúde nia prezensa hamutuk ho parseiru sira hanesan UNICEF oinsá atu seguru katak bee ne’ebé mak distribui iha territóriu tomak hanesan bee galon sira no bee áqua sira ne’ebé faan iha loja Ministériu Saúde sei esforsu makas hodi haree ba asuntu ida-ne’e,” nia dehan iha Hotel Novo Turismo, Díli.

Nia hatutan, MS sei hamutuk ho parseiru sira hodi halo kontrola ba bee aqua no galon sira ne’ebé distribui iha teritóriu tomak, atu nune’e komunidade sira ne’ebé konsumu bele ho seguru, atu nune’e sira labele hetan moras, tanba komunidade barak mak preokupa ba bee áqua no galon ne’ebé fa'an iha loja balun la iha kualidade.

Iha parte seluk, espesialista husi UNICEF, Suranga de Silva, hateten bee ne’e importante hodi kombate moras oioin iha Timor-Leste liuliu oinsá atu kombate malnutrisaun, tanba ne’e UNICEF sei servisu ho MS hodi haree ba asuntu ne’e hanesan asuntu públiku iha nasaun ida-ne’e.

“Ita atu halo teste kualidade bee ne’e Ministériu Saúde presiza iha ekipamentu ne’ebé hodi teste ba bee nomós ema sira ne’ebé iha kapasidade ne’ebé bele halo teste ba bee, tanba ne’e mak UNICEF entrega ona ekipamentu ba MS oinsá atu bele halo teste ba bee ho kualidade.” Nia dehan.

Nia dehan, UNICEF sei nafatin suporta pesoál saúde sira oinsá atu halo teste ba bee no oinsá atu halo monitorizasaun ba bee sira-ne’e, tanba komunidade sira, bainhira konsumu bee sira-ne’e mak la iha kualidade ne’e fó impaktu ba sira-nia saúde públiku.

Nia salienta, ekipamentu ne’ebé uza hodi halo teste ba bee sira-ne’e tenki halo manutensaun atu nune’e ekipamentu ne’e labele aat, entaun presiza nafatin halo monitorizasaun ba ekipamentu sira ne’ebé UNICEF oferese ba MS hodi halo teste ba bee.