- Publika iha: 12 Setembro 2023
Polísia Nasionál Timor-Leste (PNTL) rekoñese konflitu ne’ebé akontese iha rai-laran hatudu imajen ladi’ak ba mundu, nune'e mós impaktu ba Investimentu iha Timor-Leste.
Komandante Operasaun Nasionál PNTL, Superientendente Xefe Jose Soares dehan, konflitu ne’ebé akontese iha munisipíu sira, ne'e nia implikasaun ba Timor-Leste laran tomak la’ós iha munisípiu de’it.
"Ita rekoñese katak konflitu ne’ebé akontese durante ne’e lori implikasaun ladi’ak ba investimentu iha rai-laran," nia dehan.
Nia dehan ohin loron mundu teknolojia avansadu tebes konflitu ohin akontese, mundu tomak bele asesu ona, tanba ne'e bele halo atu ema estranjeiru sira la mai vizita, nune'e mós mai investe iha Timor-Leste.
"Ema sei la mai investe iha ita-nia rain no hakarak ka lakohi ita tenke halai ba serbísu hodi buka moris iha ema nia rain," Superientendente Xefe Soares dehan iha Kaikoli, Díli.
Tanba ne'e nia dehan, autoridade seguransa nafatin bolu atensaun ba inan-aman, autoridade lokál sira atu kontrola oan foinsa'e sira atu bele hado'ok an husi konflitu no tenke kria pás no estabilidade ba nasaun hodi bele kontribui ba investimentu rai-laran.
Entretantu Diretór Ezekutivu Fundasaun Mahein (FM), Nelson Belo dehan, konflitu sira ne’ebé akontese ne'e, tanba problema mentantalidade nune'e mós taka dalan ba ema estranjeiru mai halo investimentu.
"Atu halo prevensaun ba konflitu sira ne'e kabe ba polítika, ita husu ba Prezidente Repúblika atu konvoka enkontru Supremu Defesa seguransa nian atu haree took utilizasaun mekanizmu saida," nia dehan.
Maibé nia sujere labele utiliza de’it polísia no militár, tenke envolve hotu ministériu sira seluk hodi hala'o nia knar ho tratamentu ne’ebé integradu.
Nia dehan, liga ho mentalidade tanba ne'e bele kria etapa ida ne’ebé reforma mentalidade, ne'e importante, no tenke halo sosializasaun ba komunidade util ka lae ba ema sira envolve iha grupu hodi kria konflitu iha ne'e nesesariu atu halo.