Quinta, Julho 18, 2024

Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio Sanches informa iha fulan janeiru até julho tinan 2023, rejista empreza nasionál no internasionál hamutuk 31 deside taka sira-nia kompaña, tanba laiha ona kbi’it finanseiru atu kontinua.

Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio Sanches informa iha fulan janeiru até julho tinan 2023, rejista empreza nasionál no internasionál hamutuk 31 deside taka sira-nia kompaña, tanba laiha ona kbi’it finanseiru atu kontinua.

Nia dehan empreza sira-ne’e aprezenta razaun ne’ebé forte tebes katak situasaun fila fali ba normal ona, maibé sira susar tebes laiha ona kbi’it atu selu rai, eletrisidade, taxa, saláriu traballadór sira-nian tanba ne’e sira deside taka.

“Halo ita triste tanba sira-ne’e iha área ne’ebé governu promove, liu-liu área turizmu no indústria hanesan bar, restorante no halo meja, kadeira sira. Tanbasá mak área turismu no indústria mak taka tan área rua ne’e mak hetan impaktu bo’ot tebes iha tinan tolu ba kotuk, kuandu iha pandemia Covid-19,” nia hateten via telefone.

Nia hateten empreza 31 ne’e 90% husi rai-liur no 10% husi empreza nasionál tanba nia huun loloos ne’e mak kapasidade finanseiru, tanba ne’e espera governu da-sia bele iha polítika di’ak fó apoia empreza nasionál sira-ne’e bele harii fali empreza foun atu kompete iha merkadu.

Nia hatutan maské iha empreza balun ne’ebé taka, tempu ne’e mós mosu empreza foun barak, barak liu iha setór rua importante mak turizmu no agrikultura.

Nia informa iha fulan rua ikus ne’e Juñu até Jullu tinan 2023, sira konsege rejistu empreza foun purvolta 600 resin, signifika ema barak iha vontade no espíritu atu hola parte iha vida emprezariál. Entaun fila ba governua atu iha polítika ida ne’ebé di’ak apoia sira devenvolve sira-nia negósiu sai bo’ot no sustentável hodi kontribui ba reseita nasionál.

Tuir dadus SERVE, husi tinan 2013 até fulan Jullu tinan 2023, empreza ne’ebé rejistu ka hetan ona legalidade hamutuk 44,340. Husi númeru ne’e purvolta 9 mil até 13 mil mak kontribui taxa ba estadu.

Iha parte seluk, Prezidente Asosiasaun Emprezariál Muller Timor-Leste (AEMTL), Hergui Luina Fernandes Alves hateten situasaun ne’ebé nasaun enfrenta hahú husi situasaun polítika ne’ebé kauza dependénsia ba orsamentu dua désimu tinan naruk, mai mosu pandemia Covid-19. Depois pandemia akontese funu iha Ukraina, halo setór privadu difisil atu sobrevive, tanba laiha movimentu atividade negósiu nian.

“Agora sira iha hela prosesu rekuperasaun negósiu, entaun ha’u bele hetaten kresimentu iha hela prosesu rekuperasaun nian laran. Agora setór privadu hotu tenta hadia sira-nia negósiu no hein katak bele lalais kura no re-estruktura fila fali sira-nia negósiu sai bo’ot no di’ak fali,” nia hateten.

Nia hateten iha oportunidade ne’e mós mosu empendedór barak, liu-liu ema hili dalan negósiu hanesan fatin ka atividade ida iha fonte rendimentu ba aan rasik hodi ajuda família.