- Publika iha: 15 Agosto 2023
Embaxadór Malásia, iha Timor-Leste, Amarijit Sarjit Sing informa, Primeiru-Ministru Kay Rala Xanana Gusmão, husu governu Malásia atu apoia prosesu dezentralizasaun, liu-liu fornese formasaun no kapasitasaun ba servidór estadu nian kona-ba planeamentu no finansa.
Nia dehan desentralizasaun sai hanesan foku prioridade governu da-sia nian, entaun formasaun kona-ba planemanentu no finansa ba funsionáriu públiku sira, ne’e inisiu ne’ebé di’ak atu bele prepara rekursu humanu, tanba planeamentu laiha buat hotu sei lala’o.
“Primeiru-Ministru fó enfaze prioridade importante prosesu desentralizasaun iha Timor-Leste no husu governu Malásia atu haree formasaun sira ne’ebé fornese ba funsionáriu sira, liu-liu atu iha koñesimentu no abilidade klean ba aspetu rua ne’ebé Primeiru-Ministru fó enfaze aspetu planeamentu no finansa nian,” nia hateten hafoin halo enkontru ofisiál ho Primeiru-Ministru Kay Rala Xanana Gusmão, iha Palásiu Governu, Díli.
Nia hateten durante ne’e liuhusi kooperasaun no servisu téknika, Malásia fó ona formasaun ba ema na’in 600 resin iha área oioin. Maibé agora foku ba aspetu rua importante ne’ebé governu husu.
Nia hatutan Xanana mós husu embaxadór sai nafatin fonte ba nasaun rua ne’e, atubele hetan atensaun no kontinua foku ba servisu sira ne’ebé lori benefisiu ba nasaun no povu rai rua nian.
Antes ne’e, iha Parlamentu Nasionál, Primeiru-Ministru Kay Rala Xanana Gusmão hateten governu sei reve lejislasaun hotu no ninia regulamentu, tanba nesesária ba konsolidasaun estadu inklui lei sira kona-ba funsionamentu autoridade munisipál sira.
Nia dehan kuadru jurídiku ba organizasaun no funsionamentu autoridade munisipal nian no administrasaun munisipál, hodi fó kontinuidade ba estratéjia atu ba dezentralizasaun administrativu. Nomós aproveita atu aprova regulamentu kona-ba lei do poder lokal no desentralizasaun administrativu, lei eleitorál munisípiu no lei ba finansa munisipál nian.