Segunda, Outubro 02, 2023
Total visitors: 766366

Prezidente Autoridade Munisípiu Díli, Guilhermina Filomena Saldanha Ribeiro, hatete negosiante ne’ebé sempre okupa trotoar iha tempu kalan, ne'e la’ós mai husi komunidade maibé mai husi merkadu nasionál rua Taibesi no Manleuana.

Prezidente Autoridade Munisípiu Díli, Guilhermina Filomena Saldanha Ribeiro, hatete negosiante ne’ebé sempre okupa trotoar iha tempu kalan, ne'e la’ós mai husi komunidade maibé mai husi merkadu nasionál rua Taibesi no Manleuana.

Nia dehan, merkadu bo'ot rua ne'e oráriu servisu normál, maibé kuandu lokraik tuku tolu (3) ona sira sempre tula gerobak ba kareta lori sai husi merkadu mai faan iha trotoar iha dalan publiku sira hanesan, Elemloi, Kampung Baru, Audian noBekora.

"Ita identifika katak negosiante sira ne’ebé okupa trotoar ne'e la’ós mai husi komunidade, maibé mai husi merkadu naisional rua ne'e," nia dehan.

Nia dehan, negosiante hirak ne'e organizadu tebes, bainhira tuku tolu (3) lokraik ona, sira tula gerobak ba kareta hodi faan iha dalan públiku sira.

"Ita haree sira rasik mak kondisiona ema hola iha dalan públiku no la ba merkadu, tanba ne'e mak Autoridade Munisípiu Díli kumpri orden, nafatin hasai sira iha trotoar leten," Prezidente Munisípiu Díli Ribeiro dehan.

Tanba ne'e jestaun merkadu nafatin servisu hamutuk ho autoridade seguransa hodi kontrolu atividade merkadu kalan iha dalan públiku.

Entretantu Komandante Polísia Munisípiu Díli, Superientendente Xefe Orlando Gomes dehan, polísia nafatin kumpri orden hodi kontrola negosiante sira ne’ebé mak utiliza tortor hodi faan sira-nia sasan iha tempu kalan.

"Ita kumpri orden nune'e mós lei kódigu estrada númeru 6/2003, iha artigu 97 kona-ba utilizasaun trotoar ne'e ba de’it ema la’o ain la’ós halo atividade seluk," nia dehan.

Tanba ne'e dadaun ne'e koloka ona membru tránzitu sira hodi fó seguransa ba fatin sira ne’ebé mak negosiante sira,sempre utiliza hodi negósiu iha tempu kalan hanesan Elemloi, Kampu Baru, Audian, Bairu-Pite no Bekora.