Ekipa BPOM Indonesia Halo Inspesaun Ba Edifisiu Laboratóriu

Inspetór Jerál Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, IP), Ernesto Monteiro informa governu Indonésia prontu apoia governu Timor-Leste atu estabelese laboratóriu teste aihan no aimoruk, tanba ne’e ekipa husi Ministériu Negósiu Estranjeiru Indonesia no Badan Pengawas Obat dan Makanan (BPOM) halo inspesaun direita ba edifisiu laboratóriu, ne’ebé governu konstrui ona iha Tibar, iha tinan 2011.

Nia dehan iha fulan juñu, AIFAESA, IP no BPOM asina ona akordu kooperasaun, ne’ebé sira sei fó apoia ekipamentu laboratóriu nian no kapasitasaun ba rekurus humanu iha área laboratóriu nian.

“Vizita ne’e nia objetivu atu kontinua programa ne’ebé antes ne’e ami asina ona MOU iha Jakarta, iha fulan Juñu tinan 2023. Sira iha planu atu apoia ekipamentu laboratóriu tanba ita seiduak iha ekipamentu, maibé sira rasik mós tenke hatene uluk lai kondisaun ita-nia uma ne’ebé harii ba laboratóriu, uma ne’e harii iha tinan 2011,” nia hateten hafoin hasoru malu ho ekipa BPOM, iha salaun TradeInvest Colmera, Díli.

Nia hateten pedidu ne’ebé sira hato’o ba BPOM Indonesia mak apoia ekipamentu laboratóriu no kapasitasaun ba rekursu humanu tanba funsionamentu laboratóriu presiza ema ne’ebé kualifikadu ho numeru sufisiente, entau sira sei apoia formasaun ba funsionáriu sira iha laboratóriu nian iha sira-nia fatin BPOM.

Nia hatutan BPOM mós kompromete apoia laboratóriu movel ida atu fasilita AIFAESA, IP hala’o inspesaun ba iha terenu.

Iha parte seluk, Diplomata diresaun Assosiada Sudeste Asiátiku, Ministériu Negósiu Estranjeiru, Indonénsia, Noviyanti Nurmala hateten sira-nia vizita ne’e ho intensaun atu haree no identifika rekursu ne’ebé AIFAESA, IP iha ona, relasiona ho estabelesimentu servisu laboratóriu teste aihan no aimoruk, tanba sira hakarak apoia governu Timor-Leste.

“Governu Indonésia planu ona atu apoia, entaun vizita mai terenu ida-ne’e atu hatene di’ak liu kondisaun infrastrutura ne’ebé iha ona. Espera ho vizita ne’e ami bele identifika ona ekipamentu laboratóriu ne’ebé instala iha uma ne’ebé AIFAESA harii ona,” nia hateten.

Nia hateten sira-nia apoia ne’e, bazeia ba pedidu ne’ebé governu Timor-Leste, liuhusi AIFAESA hato’o ona mak ekipamentu laboratóriu no kapasitasaun rekursu umanu.