Domingo, Abril 21, 2024
Total visitors: 766366

Diretór Ezekutivu Forum NGO Timor-Leste (FONGTIL), Valentim da Costa Pinto hateten governu labele husik operadór telekomunikasaun sira hais ka naok povu nia osan tanba ho ignoránsia tinan barak ona sira kontinua fornese servisu rede internet ho kustu bo’ot, maibé velosidade la másimu.

Diretór Ezekutivu Forum NGO Timor-Leste (FONGTIL), Valentim da Costa Pinto hateten governu labele husik operadór telekomunikasaun sira hais ka naok povu nia osan tanba ho ignoránsia tinan barak ona sira kontinua fornese servisu rede internet ho kustu bo’ot, maibé velosidade la másimu.

Nia salienta dadaun ne’e iha operadór telekomunikasuan tolu, ne’ebé fornese servisu telekomunikasaun iha rai-laran, maibé atendimentu ba servisu rede internet hanesan de’it, katak lentu.

“Imajina ema rihun ida mak sira foti de’it 0, 50 sentavus ka US$1 dolar amerika loron ida, ne’e foti dolar hira ona. Buat sira-ne’e ita tenke husu ita-nia autoridade nasionál tenke forte hodi salva no proteje sidadaun sira-nia direitu, liu-liu konsumidór sira.

Aktu ida-ne’e iha tendénsia hais sosiedade ho responsabilidade tanba ita-nia ignoránsia no limitasaun ne’ebé iha uza ida-ne’e hanesan oportunidade hais konsumidór sira-nia direitu asesu telekomunikasaun, liu-liu asesu ba internet no servisu sira-ne’ebé relasaun ho komunikasaun nian,” nia hateten iha servisu fatin Kaikoli, Díli.

Nia hateten la’ós de’it velosidade internet mak la’o la másimu ka lentu loos, maibé operadór sira mós promove promosaun bosok hanesan sira halo publikasaun ruma katak gratuita, maibé depois asesu la gratuita.

Nia hatutan durante ne’e kliente sira sosa pulsa ativa pakote rede internet, maibé rede falla labele asesu loron tomak operadór sira mós la revolve kliente sira-nia osan.

“Ami dalabarak ona husu ba Autoridade Nasional Telekomunikasaun (ANC) atu haree no servisu besik ho operadór tolu ne’e bele fornese servisu ida-ne’ebé bele ajuda direitu konsumidór sira, ita lakohi fó espasu ema atu hais ita ho publikasaun sira-ne’ebé laduun fó benefisiu ba konsumidór sira,” nia hatutan.

Nia informa rede internet ne’ebé velosidade la másimu, fó mós implikasaun bo’ot ba funsionamentu servisu administrasaun nian, liu-liu atendimentu públiku sira-ne’ebé digitaliza ona hanesan pulsa eletrisidade, pagamentu impostu.

Iha parte seluk, kliente telekomunikasaun, Inocênsio Xavier hateten kustu internet iha Timor karun liu kompara ho nasaun sira iha Ázia Pasífiku, maibé la fó satisfasaun di’ak ba kliente sira tanba velosidade la másimu.

“Se ha’u sosa kalsa ida ho kustu osan US$25 dolar amérika, ha’u ba hatais nia nakles, entaun sira tenke devolve ka selu fali ha’u-nia osan. Maibé dalabarak ita ense pulsa mohu de’it, sira la devolve ita-nia osan. Sira-nia liafuan mak kargu kliente ami husu deskulpa tanba perturbasaun ba rede internet, deskulpa la rezolve, tenke devolve osan,” nia hateten.

Nia hateten aktu ida-ne’e hatudu operadór tolu ne’e ho sira-nia ignoránsia viola konsumidór sira-nia direitu, maibé autoridade nasionál lahalo xamada ida ba operadór tolu ne’e no governu ho ignoránsia la rona lamentasaun sosiedade nian durante ne’e.