- Publika iha: 11 Maio 2023
Diretór Ezekutivu Forum NGO Timor-Leste (FONGTIL), Valentim da Costa Pinto hateten durante semana ida atividade kampaña polítika hahú loron 19 abril 2023, rede sosiedade sivíl hala’o monitorizasaun iha terenu deteta Partidu Polítiku (ParPol) balun nafatin utiliza karreta estadu hodi fasilita atividade kampaña iha baze.
Nia salienta aktu ida-ne’e kontra lei tanba ne’e institusaun relevante sira hanesan Komisaun Anti Korupsaun (CAC) tenke halo supervizaun ida rigorozu hodi identifika no submete informasaun ba autoridade kompetente sira prosesu tuir lei ne’ebé vigor iha rai-laran.
“Ami mós haree katak partidu polítiku sira-ne’ebé kontinua uza fasilidade governu karreta ne’ebé sira uza hodi fasilita atividade kampaña. Ida-ne’e ami husu CAC no institusaun relevante sira-ne’ebé halo supervizaun kona-ba jestaun patrimóniu estadu no governu nian bele tau matan hodi enkamina ba orgaun sira-ne’ebé iha autoridade atu fó sansaun kona-ba prátika sira-ne’e,” nia hateten.
Nia informa dadaun ne’e iha organizasaun sosiedade sivíl nasionál, lokál no internasionál hamutuk 270 mak mahon aan iha FONGTIL, nu’udar organizasaun nongovernmental ho nia mandatu haat mak disemina informasaun, koordenasaun, empoderamentu no advokasia.
Iha parte seluk, Diretór Jerál ba Prevensaun, iha CAC, Rosario Salsinha Araújo rekoñese momentu tinan polítika ne’e iha potensiál bo’ot atu ema utiliza sala patrimóniu estadu, liu-liu karreta tanba ne’e ekipa ne’ebé kompostu husi Patrimóniu Estadu, Komisaun Funsaun Públika, PDHJ no CAC hala’o hela inspesaun no monitorizasaun iha tereinu.
Nia konsiente ho auzensia komisáriu nian, lori implikasaun bo’ot tebes ba servisu CAC nian atu halo inspesaun no monitorizasaun ba viatura estadu nian to’o iha nivel munisípiu sira. Maibé sira nafatin kontrola iha ministériu sira inklui parlamentu nasionál.
“Dadaun ne’e keixa laiha, maibé informasaun mai husi ami-nia parseru sira no ami-nia ema sira ne’ebé koloka iha ministériu sira kuaze iha informasaun kona-ba karreta sira-ne’ebé lori sai tanba ne’e identifikasaun la’o hela,” nia hateten.
Nia hateten sira simu ona lista viatura estadu nian husi liña ministériu sira no karreta 56 ba membru parlamentu sira atu sira bele kontrola movimentu karreta sira-ne’e nian ba servisu operasional sira-nian ka ba atividade kampaña.
Nia hatutan la’ós funsionáriu públiku sira de’it, maibé membru parlamentu no membru governu sira labele utiliza karreta estadu ba atividade kampaña polítika.