MI Orienta PNTL Kontrola Karreta Estadu Iha Kampaña Eleitorál

Ministériu Interior (MI) orienta membrus Polísia Nasionál Timor-Leste (PNTL) kontrola movimentu karreta estadu durante periudu kampaña elitorál parlamentár nian ne’ebé sei realiza hahu dia 19 abril to’o 17 Maiu 2023.

Vise-Ministru MI, Antonio Armindo, dehan karreta estadu la autoriza hodi ba halo kampaña, tanba ne’e funsionáriu sé de’it mak utiliza karreta estadu hodi ba kampaña ne’e krime no polísia tenke foti medida no aprezenta ba prosesu.

Nia dehan, despaxu governu hatun ona, parte polísia mós prepara ona ekipa operasaun atu bele hala’o servisu operasaun check point ba movimentu karreta estadu iha kampaña.

“Ita orienta PNTL halo kontrolu ba movimentu karreta estadu nian iha kampaña, identifika funsionáriu ne’ebé mak komete tenke halo kedan atuasaun no lori ba prosesu,” nia hatete.

Tanba ne’e nia dehan, banhira iha operasaun identifika halo kedas aprensaun ba karreta nune’e lori funsionáriu ne’ebé mak utiliza karreta ne’e ba prosesu tuir dalan kriminal nune’e mós aprezenta ba Komisaun Funsaun Públiku (KFP).

Iha fatin hanesan, Komandante Jerál PNTL, Komisáriu Henrique da Costa, dehan atuasaun ba karreta estadu iha kampaña ne’e la’ós servisu polísia nia mesak maibé servisu ekipa entre PNTL, KFP, no Komisaun Anti Corupsaun (CAC) nian.

“Ekipa operasaun tuir nafatin despaxu governu artigu 8 pontu 4 nian katak la autoriza funsionáriu públiku ida utiliza karreta estadu hodi partisipa iha kampaña eleitorál,” nia dehan.

Tanba ne’e nia dehan, bainhira polísia identifika prende kedas karreta no kaptura pesoal ne’ebé utiliza hodi entrega ba CAC hodi halo prosesu.

“Ita sei entrega mós ba Komisaun Funsaun Públika hodi bele loke prosesu disiplinár ba funsionáriu ne’e rasik,” Komisáriu Costa dehan.

Nia salienta tan, nia orienta ona membru sira kontrolu ba karreta estadu iha kampaña ne’e ho sériu labele tolera funsionáriu públiku utiliza fali patrimóniu estadu nian hodi halao kampaña partidu nian.