- Publika iha: 26 Abril 2023
Kondutór transporte públiku inklui Bus, Taxi, Mikrolete husu governu liu-liu Diresaun Nasionál Transporte Terestre (DNTT) kria kondisaun ba terminál Bekora ho sufisiente nune’e bele halo estasionamentu ba transporte públiku ho di’ak.
Kondutór Bus Diresaun Díli-Baucau, Salvador do Rosario Pinto dehan kondisaun terminál Bekora dadaun ne’e la di’ak, tanba kloot nune’e la sufisiente atu bele halo parajen ba Bus, Mikrolete no Taxi.
“Ami husu DNTT atu bele kria kondisaun terminál ne’ebé di’ak no luan nune’e mós kompleta ho seguransa,” nia dehan.
Tanba ne’e nia dehan, terminál Bekora ne’e transporte públiku husi munisípiu Manatuto, Viqueque, Baucau no Lauten nune’e mós Taxi no Miklolete sira-ne’ebé mak halo movimentu iha Díli laran mak para iha ne’e.
“Ami presiza terminál ne’ebé ho kondisaun di’ak, kompleta ho fasilidade sira hanesan sintina bee moos atu nune’e bele fasilita pasajeiru sira ho kondutór sira asesu ba,” Kondutór Pinto dehan iha Terminál Bekora.
Nia dehan, durante ne’e pasajeiru no kondutór sira iha terminál Bekora bainhira atu ba haris fatin tenke ba husu komunidade ne’ebé hela besik iha ne’ebá atu sira bele soe bee.
Enkuantu antes ne’e, DNTT planu ona atu muda terminál Bekora ba iha Hera maibé to’o agora seidauk iha rezultadu pozitivu.
Xefe Departamentu Tráfiku Terminais, iha DNTT, Abel da Conseição dehan, kona-ba kontrusaun terminál sira, ekipa husi DNTT hahú halo ona levantamentu dadus ba terminál hotu iha territóriu laran inkliu terminál sira iha Díli.
“Ita halo levantamentu dadus nune’e ita bele halo rekonstrusaun ba terminál, no Bekora ne’e la’ós terminál maibé fatin atu hatun pasajeiru sira de’it terminál sei muda ba iha Hera,” nia hatete.
Nia dehan, terminál ne’ebé konstrui iha Hera ne’e luan tebes nune’e kompleta ho ekipamentu nune’e sei tau seguransa atu bele kontrola.
Enkuantu nia dehan, la’ós Bekora de’it maibé, Manleuana nune’e mós Tasi-Tolu no Terminál Taibesi.