Quinta, Junho 13, 2024
Total visitors: 766366

Komandante Operasaun Nasionál Autoridade Protesaun Sivíl (APS), Superientendente Asistente Nunu Ronaldo Gomes dehan, parseru internasional The Pacific Community (TPC) apoiu APS hodi halo prevensaun sedu ba dezastre naturais.

Komandante Operasaun Nasionál Autoridade Protesaun Sivíl (APS), Superientendente Asistente Nunu Ronaldo Gomes dehan, parseru internasional The Pacific Community (TPC) apoiu APS hodi halo prevensaun sedu ba dezastre naturais.

Nia dehan, APS kontinua servisu hamutuk ho parseru internasionál sira ho objetivu atu bele fó asaun-prevensaun ba dezastre no mitigasaun resposta lalais ba situasaun emerjénsia sira iha rai laran.

“Ita-nia parseru internasionál The Pacific Community apoiu Autoridade Proresaun Sivil oinsa halo prevensaun sedu ba dezastre naturais iha Timor-Leste,” nia dehan.

Nia haktuir, asaun prevensaun ne’ebé sira halo mak sosializasaun ba komunidade ne’ebé hela iha área risku dezastre nune’e mós prepara materiál hodi apoiu ba vítima sira karik akontese dezastre.

“Ita-nia komunidade ne’ebé mak ita identifika ona hela iha área risku ba dezastre mak hanesan, iha Tasi-Tolu, Madohi, Pantai-Kelapa, no Hera,” Komandante Gomes dehan.

Nia dehan, aleinde apoiu halo prevensaun ba APS, TPC mos apoiu tan sirene rua hodi instala iha Embaixada Amerika nian nune’e hodi halo antisipasaun karik akontese dezastre naturais tasi-sa’e.

Enkuantu nia dehan, antes ne’e parseru internasional TPC mós konstrui ona sentru evakuasaun rua iha Munisípiu Viqueque no Covalima.

Iha fatin hanesan, Jestór Projetu TPC Herman Timmermans dehan TPC apoiu protesaun sivíl kona-ba prevensaun dezastre naturais liuhusi identifikasaun ba área risku dezastre.

“Nune’e mós ita apoiu konstrusaun sentru evakuasaun hodi salva vítima dezastre naturais sira-ne’ebé mak presiza,” nia hatete.

Nia dehan, iha kooperasaun ne’e TPC mós prontu halo instalasaun ekipamentu alarme banhira akontese tasi sa’e bele halo alarme hodi fó atensaun ba komunidade bele hado’ok an husi área dezastre sira.