- Publika iha: 25 Abril 2023
Diretór Organizasaun Sosiedade Sivíl, Luta Hamutuk, José da Costa hateten sidadaun hotu asume responsabilidade sai autór ba harii pás no estabilidade, maibé iha tinan polítika lider partidu polítiku sira mak sai autór prinsipál atu garantia pás no estabilidade iha rai-laran tanba ne’e evita hasai liafuan ne’ebé kroat hodi insulta no ataka malu iha períodu kampaña polítika.
Nia salienta esperiénsia tinan polítika sira liuba, institusaun eleitorál halo buat hotu, maibé ikus mai lider partidu polítiku sira utiliza palku hodi insulta no taka malu.
“Dalabarak ita ko’alia ona katak partidu polítiku bele iha diferensia, maibé nia objetivu ida de’it mak lori moris di’ak ba povu, tanba ne’e tenke konsidera malu no hakarak lakohi sei buka malu atu ukun. Ne’ebé sa’e palku karik sukat no tetu didi’ak liafuan sira atu labele provoka hamosu instabilidade,” nia hateten hafoin partisipa konferénsia nasionál ba eleisaun pasífiku ho tema A Fraternidade Humana Como Fator Esensial Para a Consolidasaun da paz e da Estabilidade Democrática, iha salaun CNE Colmera, Díli.
Nia dehan seminariu sira kona-ba faternidade humana ne’e importante tebes atu reforsa fali espíritu timoroan sira-nian atu garantia pás no estabilidade hodi bele aselera prosesu dezenvolvimentu, liu-liu lori moris di’ak ba povu.
Enkuantu Diretora Organizasaun Movimentu Feto Foinsa’e Timor-Leste (MOFFE-TL), Yasinta Lujinha espera lidera partidu polítiku 17 ne’ebé partisipa iha eleisaun parlamentár 2023, bele hatudu sira-nia maturidade polítika, liuhusi utiliza palku fahe vizaun no programa tinan lima nian la’ós insulta malu.
“Hanesan sosiedade sivíl no organizasaun feto ne’ebé hola parte iha prosesu eleitorál hodi observa prosesu sira la’o, ami hanoin katak ita tenke kontinua nafatin hatudu maturidade polítika, liu-liu ita ko’alia kona-ba prosesu eleisaun ne’ebé nakonu ho dame no kria moris hakmatek ba ita-nia estadu ida-ne’e,” nia dehan.
Nia hateten orgaun eleitorál rua, STAE no CNE tenke hala’o sira-nia funsaun ho efetiva iha prosesu tomak, liu-liu CNE tenke foti asaun hasoru partidu polítiku sira ne’ebé viola lei ka komete krime eleitorál tanba esperiénsia laiha asaun aktu sira ne’e kontinua mosu iha eleisaun sira tuir mai.
Iha parte seluk, Prezidente Komisaun Nasionál Eleisaun (CNE), José Agostinho da Costa Belo hateten sira simu ona kalendáriu kampaña husi partidu polítiku sira, ne’ebé sei loke diskusaun ho partidu polítiku sira no Polísia Nasionál Timor-Leste (PNTL) hodi asegura kampaña polítiku la’o diak durante fulan ida hahú dia 19 Abril to’o 18 Maiu 2023.
“Eleisaun la’o di’ak kampaña mós la’o di’ak entaun palku ne’e iha atu ita hato’o programa no buat sira-ne’ebé diferente tanba diferensia sira-ne’e mak halo ita sai riku maibé labele sai fali konflitu labele ataka malu pessoál,” nia hateten.