- Publika iha: 18 Abril 2023
Koordenadór Jestaun Merkadu Taibessi, António Manuel de Araújo informa fulan ida ona mákina bomba bee avaria automatikamente fasilidade hanesan hariis fatin la funsiona tanba ne’e vendedór sira tenke dezaraska sosa bee hodi utiliza ba nesesidade lorloron nian.
Nia salienta merkadu la asesu ba sistema kanalizasaun bee husi fatin seluk, durante ne’e utiliza sistema bee rai okos ne’ebé uza mákina bomba hodi fornese bee ba vendedór sira iha merkadu tanba ne’e mákina avaria laiha asesu ba bee.
“Agora fulan ida ona bomba bee avaria. Ha’u hato’o ona ba autoridade munisípiu Díli liuhusi depatamentu ba departamentu to’o ona iha ne’ebá, maibé seidauk iha resposta ida mai. Ita-nia vendedór sira sosa bee tanki ne’ebé faan sira uza, entaun liga ho haris fatin sira paradu hela,” nia hateten iha servisu fatin Taibessi, Díli.
Nia hateten kondisaun infra-estruktura merkadu Taibessi presiza halo konstrusaun foun atu bele akumula vendedór sira husi munisípiu hotu ne’ebé mai halo negósiu atu sira bele halo negósiu ho dignu no seguru.
Iha parte seluk, vendedór Abel dos Santos hateten kondisaun merkadu Taibessi la seguru ba negosiante sira atu halo negósiu.
“Iha ne’e tempu ami presiza ba hari fatin mós sintina ladi’ak no fatin sira ladi’ak hotu. Entaun ami husu ba governu ida-ne’e tau atensaun atu ami bele halo negósiu ho di’ak,” nia hateten.
Nia hateten sira la husu buat barak ba governu, maibé sira husu de’it fatin ida-ne’ebé dignu no seguru ba sira atu halao sira-nia atividade negósiu hodi sustenta no hadia moris lorloron nian.