SEPS Seidauk Bele Hapara Komunidade Hari Uma Iha Foho Leten

Sekretáriu Estadu Protesaun Sivil (SEPS), Joaquim Gusmão dos Reis Martins hateten governu halo esforsu hakbesik aan ba komunidade sira fo hanoin nafatin atu labele halo uma iha area risku hanesan mota ninin, foho leten to’o tempu ida sei hasai obrigatoriu.

“Protesaun sivil bele hakbesik ba sira fo hanoin nafatin sira labele hari uma iha fatin sira ne’e. Maibe atu hapara ita protesaun sivil seidauk bele halo ida ne’e tanba sei iha ekipa konjunta ida interministerial ne’ebé lidera husi Ministériu Planu Ordenamentu mak bele hatene fatin ne’ebé mak bele halo uma no halo asaun sira,” nia hateten iha Hotel Timor, Dili.

Nia dehan dadaun ne’e ekipa interministerial halo hela identifikasaun fatin sira ne’ebé risku no fo xamada ba familia sira atu labele harii uma iha fatin risku dezastre.

Nia hateten seidauk iha dadus kompletu konaba uma kain ne’ebé okupa area risku dezastre, maibe observasaun hare fatin sira hanesan mota Comoro ninin ema hari uma barak, mota Becusse mos iha uma no foho leten sira sa’e ba parte Balide nian sai tiha sidade tanba uma balun andar bo’ot.

Nia haktuir area sira foho leten no mota ninin ne’e risku bo’ot tebes ba dezastre, no komunidade sira ne’e konsente tebes sira iha risku nia laran. Maibe nafatin la preokupa ho sira nia seguransa vida rasik.

Iha parte seluk, Xefe Suku Villa Verde, Postu Administrativu Vera Cruz Munisípiu Dili, Abdul Mancoli Arranhado hateten sosializasaun informasaun halo beibeik ona ba komunidade atu labele halo uma iha area risku dezastre, maibe larona autoridade kontinua nafatin halo tanba ne’e presiza duni baze legal ida ne’ebé forte atu akuza ema ne’ebé halo uma iha area risku.

“Agora ida-ida hetan rai nia halo deit uma laiha autorizasaun, depois hetan dezastre ona mak husu ba governu. Ami avizu hotu ona katak labele halo uma iha rai lolon, mota ibun. Maibe kontinua nafatin,” nia hateten.

Tuir obsevasaun TDW iha treinu, hare numeru uma iha foho leten sira parte Comoro, Tasi Tolu, Balide rai hun aumenta. No uma sira ho modelu diferente barak uma semi permanente, maibe balun uma permanente ho kondisaun andar.