- Publika iha: 10 Fevereiro 2023
Prezidente Komisaun Nasionál Eleisaun (CNE), José Agostinho da Costa Belo hateten komisáriu sira no estrutura husi nasionál to’o munisipál halo hela ezersísiu atu haree estratéjia no métodu ne’ebé di’ak hodi garante eleisaun parlamentár períodu 2023 bele la’o ho susesu.
Nia salienta sira aprende husi eleisaun anteriór servisu balun lao la efetivu, liu-liu prezensa iha sentru votasaun, koordenasaun ho partidu polítiku sira atu hasa’e partisipasaun, tanba ne’e presiza hadia métodu servisu balun atu eleisaun partisipa másimu husi eleitór sira.
“Altura ne’ebá ita haree buat ida paktu sira ne’ebé la’o la efetivu, entaun iha modelu seluk ne’ebé ita tenke muda tanba ne’e agora dadaun servisu hamutuk ho parte Igreja, ami-nia enkontru ho bispo sira, ita espera iha tan hanoin foun katak povu katólika, eleitór maioria katolika iha mos relijiaun seluk ita sei koordena hotu. Tanba orasaun mós importante la’ós servisu de’it, igreja nia partisipasaun iha aspetu morál ita presiza,” nia hateten bainhira partisipa iha workshop nasionál ho tema Hametin Forsa Servisu ba Eleisaun Parlamentar 2023, iha salaun CNE Colmera, Díli.
Nia dehan baze legál di’ak no forte tebes, maibé atu eleisaun ne’e la’o ho di’ak presiza ema hotu nia partisipasaun, tanba ne’e halo hela esforsu atu haforsa atividade edukasaun sívika ba eleitór sira, liu-liu eleitór foun atu bele partisipa.
“Ita halo buat hotu tanba eleisaun la’ós obrigatóriu, entaun aprosimasaun no servisu ne’ebé besik no atendimentu ne’ebé di’ak atu nune’e eleitór sira partisipa ho di’ak,” nia hatutan.
Nia hateten estratéjia ida mak eleisaun parlamentár tinan 2023, sentru votasaun no estasaun votu iha rai-laran no rai-liur, liu-liu nasaun Austrália, Portugal, Korea do Sul, Inglaterra sei aumenta tan atu sidadaun sira-ne’ebé kontinua estudu no servisu iha rai liu, sira-ne’e bele partisipa iha eleisaun.
Iha parte seluk, Diretór CNE, munisípiu Viqueque, Honorio Cruz da Silva hateten nu’udar orgaun independente ne’ebé halo supervizaun ba aktu eleitorál importante tebes atu prepara forsa servisu hodi serbí no halo susesu ba eleisaun parlamentár nian.
“Objetivu prinsipál husi atividade edukasaun sívika ne’e rasik mak oinsa ita bele konvense eleitór sira partisipa ativa iha prosesu eleisaun ne’e rasik no sira tenke apar ho prosesu eleisaun parlamentár ne’ebé sei akontese iha tinan ida-ne’e,” nia hateten.
Nia hateten dadaun ne’e sira loke ona rekrutamentu ba ofisiál supervizaun eleitorál atu bele koloka iha sentru votasaun estasaun votu sira iha territóriu munisípiu atu halo supervizaun ho rigór hodi asegura prosesu eleisaun ne’e la’o ho transparensia.