- Publika iha: 20 Janeiro 2023
Sekretáriu Estadu Juventude no Desportu (SEJD) aloka ona orsamentu ho montante $40,000 ba Komité Paralimpiku Nasionál Timor-Leste (CPNTL) hodi prepara ba Sea Games iha Kambodia.
Sekretáriu Estadu SEJD, Abrão Saldanha, hatete Sea Games ne’ebé mak realiza fulan juñu, iha Kambodia ne’e ho modalidade neen (6) mak CPNTL prepara ona hodi ba kompete.
“Ita aloka ona orsamentu $40,000 ba iha Komité Paralimpiku Nasionál Timor-Leste (CPNTL) hodi halo preparasaun ba modalide 6 ne’e hodi ba partisipa iha Sea Games iha Kambodia,” nia dehan.
Nia dehan, modalidade 6 ne’e inklui Atletizmu, Halterafelismu , Table tennis, Badminton, Xadres, no seluk tan.
“Ba modalidade 6 ne’e ita prepara ona atleta na’in 14, sira preparadu no treinadu ona,” SEJD Nokosico dehan iha SEJD.
Nia dehan, modalidade ne’ebé mak prepara ona no atleta kada modalidade ne’e rekomendasaun husi komisaun Sea Games kada modalidade ida altela partisipa husi altela na’in-rua (2).
“Tanba ne’e husu ba federasaun husi modalidade hirak ne’e atu prepara di’ak liu tan nune’e bele lori Timor-Leste ba mundu no lori vitoria mai Timor-Leste husi kompetisaun Sea Games ne’ebé mak kompete,” nia hatete.
Enkuantu nia dehan, SEJD mós sei halo avaliasaun ba modalidade sira-ne’e, nune’e bele konsulta ho Internasional Paralympie Comite ho regra internasionál sira atu nune’e bele re-organiza federasaun paralympiku iha Timor-Leste.
Entretantu, Sekretáriu Jeral Komité Paralimpiku Nasionál Timor-Leste (CPNTL), Jose da Silva Monteiro, dehan preparasaun ba kompetisaun Sea Games dadaun ne’e CPNTL orienta ona ba federasaun sira hodi prepara membru sira ne’ebé mak selesionadu hodi partisipa.
“Maské atleta hira ne’ebé selesionadu ne’e sai ona manan na’in iha Sea Games maibé presiza treinu no prepara tan halo di’ak nune’e bele hatudu goju ne’ebé mak di’ak ba iha mundu,” nia dehan.
Enkauntu Sea Games ne’e partisipa husi nasaun hamutuk 35 mak kompete iha goju refere tanba ne’e tenke prepara atleta sira halo di’ak.