Sexta, Março 01, 2024
Total visitors: 766366

Xefe Suku Comoro, Postu administrativu Dom Aleixo Munisípiu Díli, Eurico da Costa de Jesus informa bazea ba dadus levantamentu sosio-ekonomia 2021, família uma-kain hamutuk 4000 husi totál 10,236 mak halo uma iha área risku ba dezastre naturais, hanesan foho leten, mota ninin, mota klaran no área protejidu Tasi-Tolu.

Xefe Suku Comoro, Postu administrativu Dom Aleixo Munisípiu Díli, Eurico da Costa de Jesus informa bazea ba dadus levantamentu sosio-ekonomia 2021, família uma-kain hamutuk 4000 husi totál 10,236 mak halo uma iha área risku ba dezastre naturais.

Nia konsiente depois akontesimentu inundasaun iha loron 4 fulan Abril tinan 2021, governu planu atu hasai hotu família sira ne’ebé hela iha área risku inklui Tasi-Tolu.Maibé to’o agora seidauk no númeru uma iha área risku, liu-liu foho leten aumenta ba beibeik.

“Lorloron imi haree populasaun lubun ida kontinua halo nafatin uma iha foho leten, ami xefe suku sira labele ba kontrola sasan sira ne’e iha foho leten ne’ebá tanba ema halo iha kalan loron uma prontu ona,” nia hateten iha servisu fatin Comoro, Díli.

Nia dehan populasaun sira la’ós de’it hela iha mota ninin, maibé hela tama to’o mota laran ona hanesan iha aldeia moris foun nian no fomentu I no II ema hela iha mota laran.

Nia hateten komunidade sira ne’e informadu katak labele halo uma iha foho leten, mota ninin no mota klaran, maibé nafatin halo.

Nia hatutan lideransa komunitária laiha poder atu hasai no muda komunidade husi hela fatin, ne’e kompeténsia no responsabilidade governu nian atu buka fatin hodi muda komunidade husi fatin risku.

Iha parte seluk, Komunidade Manuel Soares hateten atu redús movimentu ema nian mai iha kapitál Díli, maka governu tenke iha polítika ne’ebé di’ak no komitmentu atu dezenvolve munsípiu sira hotu atu komunidade bele hetan nível moris ne’ebé di’ak iha sira-nia horik fatin.

“Ha’u hanoin laiha dezevolvimentu iha munisípiu sira maka ema hotu sei halai mai iha kapitál Díli, no klaru ema barak laiha espasu fatin risku sira sai opsaun ba sira halo uma hodi hela,” nia hateten.

Nia dehan maneira únika atu rezolve movimentu ema nian mai iha kapitál Díli maka tenke kria kondisaun sira iha kada munisípiu atu ema bele hetan nível moris ne’ebé di’ak.