Sexta, Dezembro 09, 2022
Total visitors: 692386

Governu liuhusi Ministériu Agrikultura no Peska (MAP) to’o oras ne’e seidauk kria lisensa komersiál ba Ai-Kamelin iha Timor-Leste hodi fasilita komunidade bele faan.

Governu liuhusi Ministériu Agrikultura no Peska (MAP) to’o oras ne’e seidauk kria lisensa komersiál ba Ai-Kamelin iha Timor-Leste hodi fasilita komunidade bele faan.

Xefe Departamentu Guarda Florestal, iha MAP, João Dasi Mau dos Reis, dehan tuir loloos ne’e governu tenke loke lisensa komersiál ba Ai-Kamelin, nune’e bele fó livre komunidade faan.

“Ita haree volume Ai-Kamelin iha Timor-Leste la dun barak ne’e, banhira fó lisensa ita-nia komunidade faan ita bele kontrola, maibé governu mak seidauk kria lisensa komersiál hodi fasilita komunidade faan Ai-Kamelin,” Xefe Departamentu Guarda Florestal Reis hatete.

Tanba ne’e nia dehan, dalan di’ak liu mak loke tiha lisensa ida para komunidade bele halo komérsiu ka sira faan fali ba kompañia ruma ne’ebé mak iha interese atu sosa Ai-Kameli ne’e.

“Fó tiha lisensa ida haruka kompañia ruma mai sosa, ita bele kontribui selu taxa ba estadu. Ha’u hanoin ida ne’e dalan di’ak liu duke ita bandu mais la iha solusaun,” nia sujere.

Iha parte seluk Membru Parlamentu Nasional, Deputado Mariano Asanami Sabino dehan, governu tenke kria polítika hodi bele jere Ai-Kamelin ne’ebé mak komunidade kuda no hakarak faan.

“Ita haree dala barak ona ita-nia komunidade ba tesi Ai-Kamelin tinan barak ona komunidade kuda ka balun moris rasik iha foho leten sira, no sira tesi tanba governu rasik la iha polítika hodi jere ho di’ak,” Deputado Asanami dehan.

Nia dehan, sitausaun mudansa klimátika ai horis mak asegura ba meiu ambiente no no Ai-Kamelin ne’e seidauk to’o nia tempu hodi kolleita tanba ne’e presiza asegura.

“Atu asegura sitausaun hirak ne’e, ita husu governu tenke kria polítika ida hodi jere didi’ak Ai-Kamelin ne’ebé mak Timor-Leste iha, la’ós ko’alia de’it,” nia sujere iha Parlamentu Nasional.

Enkuantu nia dehan, karik governu la iha rekursu hodi kontrola Ai-horis sira tenke halo rekrutamentu ba membru guarda florestal sira hodi destaka kada munisípiu hodi kontrola ai-horis sira.