Filme ho títulu Stand Down husi grupu Gembel Pantai Kelapa (GPL) sai vensedór iha eventu Dili Internacional Film Festival (DIFF) ba tinan 2022.

Filme ho títulu Stand Down husi grupu Gembel Pantai Kelapa (GPL) sai vensedór iha eventu Dili Internacional Film Festival (DIFF) ba tinan 2022.

Diretór DIFF, Lena Lenzen dehan, kompetisaun iha tinan 2022 nian ho tema “hahu fila fali” ne’ebe partisipa husi grupu film-maker Timoroan na'in 10 inklui grupu Gembel Pantai Kelapa, Matebian Production, Bihanna Production, Mambae Production, Nokolait Entertainment no seluk tan.

“Husu grupu film-maker lokál 10 ne'ebé partisipa iha kompetisaun DIFF ho filme lokál 10, filme ho títulu Stand Down husi grupu Gembel Pantai Kelapa mak sai primeiru vensedór ba eventu DIFF tinan 2022 nian,” Diretór DIFF Lenzen dehan.

Nia dehan, segundu lugar ba filme ho títulu “ha'u nia mundu sai nakukun” husi , Matebian Production, terseriu lugar monu ba filme ho títulu Momentu husi Bihanna Production.

“Husi grupu vensedór sira ne’e primeiru lugar hetan trofeu ida no orsamentu ho montante $750, segundu lugar trofeu ida no osan $500, no terseriu lugar hetan trofeu ida no osan $250,” nia dehan.

Fonte ne’e dehan, kompetisaun refere realiza hodi fó oportunidade ba film-maker Timoroan no film-maker Internasional sira bele promove sira-nia talentu iha mundu acting nian.

“Liuhusi filme 10 ne'ebé submete husi grupu film-maker Timoroan sira ne’e mesak kapás tebes tanba hatudu espresaun ne'ebé naturál tebes, tuir duni natureza no realidade ne'ebé akontese iha mundu ohin loron nian, bazeia ba tema DIFF nian “hahu fila fali” ,” nia dehan.

Nia dehan, aleinde partisipa iha kompetisaun ne’e, DIFF mós organiza treinamentu kona-ba acting nian ba film-maker Timoroan sira, ne'ebé mak formadór husi film-maker no produtór internasionál na'in 5 husi Japaun na'in 2, Indonezia na'in 1, Alemañia 1, no Amérika nian 1, durante loron 5.

Iha fatin hanesan, Produtór ba Filme ho títulu Stand Down, Jaime Rodriges, dehan filme badak ne'ebé partisipa iha kompetisaun ne’e nia istória kona-ba joven mane ida ne'ebé mak durante ne’e vandalismo, maibé to’o ikus nia arepende fali.

“Ami hetan primeiru lugar ne’e tanba esforsu ekipa nian, ami loos la espera sai primeiru vensedór. Realidade ami sai primeiru vensedór fali agradese,” nia haktuir.

Nia dehan, filme badak ne’e sira shooting durante loron 4 de’it no nia prosesu edita durante loron 3, actor ne'ebé mak halimar iha filme ne’e hamutuk na’in 8.

“Lokasi ami shooting filme iha tasi tolu ibun, uma, no diskoteka,” nia informa iha palasiu nobre Lahane.

Enkuantu nia dehan, difikuldade ne'ebé mak ekipa hasoru iha prosesu shooting filme ne’e mak ekipamentu.