- Publika iha: 04 Outubro 2022
Open Society Foundation Amerika kopera ho estadu Timor-Leste hodi apoiu dezenvolve media privadu sira iha Timor-Leste emtermos konstrui sede nune’e mos ekipamentu.
Prezidente Republika Demokratika Timor-Leste, Jose Ramos Horta, dehan instituisaun media iha Timor maioria privadu durante ne’ebe ho rekursu rasik no hasoru difikuldade barak, maibe sira hatudu produtividade ne’ebe mak diak tebes liu husi publika informasaun hodi kuntribui ba dezenvolvimentu iha Timor.
“Tanba ne’e mak hau kopera ho Open Society Fundation Amerika no sira mos prontu hodi apoiu dezenvolve media privadu iha Timor tantu televizaun, radiu, jornal no mos oline,” Prezidente Horta dehan.
Nia dehan, apoiu ida ne’e la’os formasaun maibe foka liu ba ekipamentus no infaestrutura nune’e bele fasilita diak liu tan jornalista husi media privadu sira halo servisu ho diak liu tan nune’e mos iha fatin ne’ebe mak seguru.
“Apoiu ne’e hau buka ba mídia privadu, tanba mídia governu hanesan RTTL no seluk tan ne’e governu iha orsamentu hodi dezenvolve. Hau nia preokupasaun mak media privada, para ita nia jornalista sira bele iha ekipamentu hodi dezenvolve sira,” nia infroma.
Enkuantu nia dehan, konaba media publiku hanesan RTTL nia halo koperasaun ona ho governu Korea hodi tulun, maibe sei kopera mos ho governu tanba desizaun iha sira nian liman.
Alende ne’e total Instituisaun mediak iha Timor hamutuk liu 16, husi ne’e iha mediak publiku ne’e rua mak Tatoli ho RTTL seluk privadu hotu.
Iha fatin hanesan, CEO Open Society Foundation Amerika, George Soros, dehan prontu apoiu Timor-Leste iha area saida deit mak Timor presija, tanba ne’e liu husi koperasaun ne’ebe iha sira apoiu iha area rua primeiru ba media privadu, no segundu ba feto iha negosiu.
“Ami kontente tebes ho servisu koperasaun ho Prezidente Timor-Leste hodi apoiu media, nune’e mos feto iha negosiu,” CEO Soros dehan.
Nia dehan, haksolok tebes tanba bele apoiu Timor-Leste liu-liu iha area ne’ebe mak koalia ona entre Prezidente Horat ho nain ba Open Society Fundation no apoiu ne’e prontu ona hein implementa iha tempu besik.