Sábado, Outubro 01, 2022
Total visitors: 668062

Presidente Autoridade Munisipiu Dili, Guilhermina Filomena Saldanha hateten governu liu husi Ministeriu Planu no Ordenamentu indika rai 15 hektar iha Aldeia Mota Quic, Suku Hera, Postu Administrativu Cristo Rei, Munisipiu Dili hodi halo konstrusaun ba sentru multifusaun atu bele responde ba dezastre naturais, liu-liu halo evakuasaun ba vitima sira tanba fatin ne’e laiha risku ba dezastre naturais.

Presidente Autoridade Munisipiu Dili, Guilhermina Filomena Saldanha hateten governu liu husi Ministeriu Planu no Ordenamentu indika rai 15 hektar iha Aldeia Mota Quic, Suku Hera, Postu Administrativu Cristo Rei, Munisipiu Dili hodi halo konstrusaun ba sentru multifusaun atu bele responde ba dezastre naturais.

Nia dehan sentru ne’e importante no nesesariu tebes tanba esperensia akontesementu Inundasaun iha loron 4 fulan Abril tinan 2021, laiha fatin evakuasaun proprio ba vitima sira tanba ne’e Igreja Katolika mak fo fatin akumula vitima sira no utiliza mos eskola balun.

“Problema ne’ebe ita hasoru mak bainhira ita uza fasilidade eskola ita mos fo impaktu ba prosesu ensinu aprendijajen. Sorti foin dadaun akontesementu iha Dili ne’e, ita hasoru hela pandemia Covid-19, iha ne’ebe prosesu aprendijajen lalao. Ida n’e mak ita preokupa, maibe agradese ba governu tanba liu husi Ministeriu Planu no Ordenamentu bele identifika ona fatin iha Hera, ne’ebe mak tuir prespetiva levantamentu dadus hare katak fatin ne’e la risku ba dezastre,” nia hateten bainhira partisipa iha Workshop Exersisiu Meja ho tema Asistensia Humanitaria no Responde Dezastre, iha Hotel Timor, Dili.

Nia sujere mos ba Ministeriu Interior no Sekretariu Estadu Protesaun Sivil bele hare mos futuru instalasaun ba struktura husi munisipiu Dili, atu bele iha fleksibilidade atendimentu bainhira iha asidente ruma akontese iha postu administrativu hat iha Dili laran tanba iha estrada rua ba Hera mak liu husi tasi ibun metiaut no husi fatu ahi, entau presiza hare mos diresaun rua ne’e seguru iha tempu mosu dezastre atu bele halo transportasaun vitima sira no apoia humanitarian sira ba to’o iha Hera.

Iha parte seluk, Vice Ministru Interior, António Armindo hateten Ministeriu Administrasaun Estatal, Miguel Pereira de Carvalho aprezenta ona rai ne’ebe defini iha Hera, iha Konselho Ministru tanba ne’e prosesu sira ne’e lao hela atu harii sentru evakuasaun ida ne’ebe proprio.

Nia dehan workshop exersisiu meja ne’e bele lori parseru dezenvolvimentu sira tantu agensia internasional no organizasaun nasional sira inklui liña ministeriu sira atu diskute planu integradu hodi responde ba dezastre naturais iha futuru.

“Ida ne’e mak lori parseru hotu-hotu mai halo diskusaun koalia klean para tau lolos matadalan ida hodi guia ema hotu, liu-liu protesaun sivil oinsa bele kordena diak servisu hamutuk ho parseru sira,” nia hateten.

Nia hateten governu iha ona prontidaun naton kompara ho tinan 2021, bainhira akontese dezastre inundasaun iha loron 4 fulan Abril tinan 2021, liu ba tanba iha ona legislasaun ne’ebe asegura servisu autoridade sira nian, instala no reforsa ona sentru operasaun, kontinua dezenvolve rekursu humanu no infrastruktura sira.