- Publika iha: 27 Julho 2022
Kordenador Servisu Lisensiamentu Publisitaria, iha Munisipiu Dili, Julio Fonseca Lopes do Rosario informa iha fulan Janeiru to’o Junho tinan 2022, Munisipiu Dili konsege rekolha reseita ho montante $84,385.52 husi atividade publisitaria hodi kontribui ba kofre estadu.
Nia salienta servisu ida ne’e bazea ba dekretu lei no 51/2016 alterada ba lei no 31/2017, konaba mensajen lisensiamentu publisitaria. Hahu tinan 2017, empreza hamutuk 300 mak hetan ona lisensa ba atividade publisitaria, maibe balun la kumpri sira nia dever tanba ne’e taxa seidauk rekolha ho diak.
“Ami bele planu barak, iha inisiativa diak no ami hakarak halo buat hotu-hotu, maibe kuandu fasilidade la kompletu ami labele halo buat ida. Durante ne’e ami nia fasilidade ne’ebe la kompletu mak transporte atu fasilita ami nia servisu operasional iha trenu tanba kareta ne’ebe iha paradu halo atividade lao ladun diak, ne’e mak dificulta ba ami,” nia hateten iha servisu fatin Matadoru, Dili.
Nia hateten servisu ne’ebe durante ne’e aplika mak kompaña sira hatama rekrementu mai autoridade Dili hodi hetan autorizasaun ba publisidade, maibe antes fo autorizasaun ekipa avaliasaun tekniku halo uluk identifikasaun no klarifikasaun ba rekrementu ne’ebe submete, liu-liu hare medida no lokalidade hodi bele halo kalkulasaun ba valor taxa.
Nia hatutan kalkulasaun valor taxa loos ona no hetan ona aprovasaun husi presidente autoridade mak kompaña hetan defermentu hodi ba halo pagamentu direita iha banku BNCTL.
Nia haktuir hateten atu hadia servisu ida ne’e sira iha planu atu loke tenderizasaun ba kompaña publisitaria sira, katak kompaña ne’ebe manan tender mak bele halao atividade publisidade tanba ho ida ne’e mak bele rekolha taxa ho diak.
Iha parte seluk, Presidente TANE Konsumedor, António Ramos hateten presiza halo sensibilizasaun diak ba operador ekonomika sira no konsumedor sira konaba lei sira tanba iha publisidade balun bosok konsumedor sira.
“Iha Dili laran ne’e ami nia intervensaun balun konaba buat ida ema dehan katak publisidade bosok ten. Liu-liu Xina sira, kuandu ita tama iha loja iha odamatan hakerek produtu iha laran ho presu $1-$5 dolar, tama iha laran produtu balun folin liu $5 ne’e bosok,” nia hateten.
Nia hateten sira laiha kompetensia atu fo sansaun ba empreza sira ne’ebe bosok konsumedor sira, maibe sira halo denunsia ba autoridade kompetente atu bele foti asaun, liu-liu aplika sansaun multa tanba ne’e viola lei do konsumedor.