PAM Dili Halo Re-Alokasaun Ba Vendedor Iha Merkadu Manleu

Presidente Autoridade Munisipiu Dili (PAM), Guilhermina Filomena Saldanha fo ona orientasaun ba jestor merkadu Manleu atu halo identifikasaun fatin, ne’ebe mamuk hodi koloka vendedore sira ne’ebe durante ne’e okupa jardin no fatin estasionamentu atu tama hotu ba laran.

Nia dehan iha merkadu laran fatin balkaun barak mak abandona hela, maibe vendedor sira mai hotu iha oin okupa jardin no fatin estasionamentu, ne’e labele tenke tama hotu iha laran.

“Ita nia vendedor sira iha ne’eba sira hakarak faan mai iha oin, entau sira faan iha oin ona komprador la ba kotuk, ne’e labele. Ita kuandu merkadu estadu fakar osan harii infrastutura ita tenke uza, entau ami mos hato’o ba sira fatin mak ne’eba identifika ita bo’ot sira muda ba balkaun A ou B. Se lakohi muda ba balkaun labele faan iha merkadu,” nia hateten iha Balide, Dili.

Nia hateten tinan ne’e, governu tau osan oituan atu hadia kondisaun sira iha merkadu atu bele akumula vendedor sira hotu iha laran.

Nia hatutan merkadu Manleu organizadu ona, maka sira sei hare fali merkadu Taibessi, ne’ebe mais komplikadu.

Iha parte seluk, Jestor Merkadu Manleu, Julio Barros Caldas hateten vendedor sira ne’ebe okupa jardin no fatin estasionamentu ne’e maioria faan produtu lokal tanba balkaun ne’ebe governu harii aas liu no bee bele nakonu iha balkaun, bainhira vendedor sira rega modo.

“Durante tinan barak sira uza deit jardin la mai iha ne’e, tanba kondisaun laran ne’e kuaze ladiak rai rahun barak, duut naruk, bee sulin arbiru. Maibe foin dadaun governu halo rehabilitasaun no hadia valeta diak ona, entau tenke muda sira mai iha laran,” nia hateten.

Nia dehan vendedor ne’ebe okupa jardin no estasionamentu, ba vendedor produtu lokal hamutuk 69 no faan Obralan nain 20 husi total vendedor hamutuk 849, ne’ebe ativu halo negosiu iha merkadu Manleu.

Nia hateten fatin mamuk iha laran mos la sufisiente atu muda vendedor sira hotu, tanba ne’e sira sei hare fatin mamuk halo dezenho fo ba vendedor sira atu harii rasik fatin hodi faan sira nia sasan, liu-liu ba vendedor obralan nian.