- Publika iha: 19 Janeiro 2022
Sekretario Estado Protesaun Sivil (SEPS) iha ona pesoal bombeiros foun hamutuk nain 60 hodi destaka ba posto bombeiro iha munisipio tolu (3), Mantuto, Liquica, no Ermera, ne’ebe mak durante ne’e seidauk iha pesoal destakadu.
Diretor Geral Protesaun Sivil, Ismael Babo, hateten bombeiro nain 60 refere preparado ona liu husi formasaun ne’ebe mak sira tuir durante fulan sia (9) nia laran, nune’e bele ona destaka bombeiro ba iha munisipio tolu.
“Membro bombeiros foun nain 60 ne’e husi munisipio tolu ne’e kada munisipio iha pesoal hamutuk 20 hodi halo atendimento bainhira insendiu ruma akontese,” DG SEPS Babo informa.
Nia dehan, dadaun ne’e SEPS hetan mos apoiu husi Care Internasional liu-liu konba ekipamentos hodi destaka ba postu bombeiros iha Timor-Leste.
“Tuir lolos ne’e kada postu munisipio tenke membro bombeiros pelotau ida maibe dadaun ne’e ita sei tau uluk nain 30 depois ita sei halo rekrutamento hodi kompleta,” nia salienta.
Iha fatin hanesan membro foun bombeiros, Elizia da Costa Alves, hateten ho konhesimento ne’ebe nia hetan durante formasaun ne’e nia sei aplika iha postu bombeiros ne’ebe mak nia destaka ba hodi halo atendimento lalais ba dezastre ka insendiu ne’ebe akontese maske iha risku nia laran.
“Bainhira ami tun ona iha postu ami sei aplika koinesimento sira ne’ebe mak ami hetan iha formasaun ida ne’e,” membro bombeiros Alves hateten.
Maske nune’e nia dehan, bombeiros ne’e servisu ida ne’ebe mak risku tebes ba ema nia vida, maibe hanesan feto ne’ebe mak hola parte iha korpo bombeiros nafatin hamutuk ho mane sira hodi kombate insendiu iha komunidade.