Quarta, Janeiro 19, 2022
Total visitors: 600398

Eis Presidente da Republika, José Ramos Horta deklara oferese residensia iha Metiaut ba grupo arte moris provizoriu rai sira nia produtu artistika, ne’ebe iha loron 1 fulan Dezembru tinan 2021, governu orienta membrus polisia nasional hasai obrigatoriu husi sira nia fatin anterior.

Eis Presidente da Republika, José Ramos Horta deklara oferese residensia iha Metiaut ba grupo arte moris provizoriu rai sira nia produtu artistika.

Nia dehan grupo joven sira ne’e halao atividade artistika iha fatin refere tinan 20 resin ona, ne’ebe lolos governu tenke tau osan hadia fatin ne’e ba joven kreativu sira atu dezenvolve sira nia talentu iha arte no kultura, maibe derepente governu ba hasai produtu artistika sira ne’e soe sai hotu ba liur.

“Triste tebes uma barak abandonadu hela iha Dili laran ne’ebe partense ba estado no uma barak privado ne’ebe ema prontu fo aluga. Tanba sa mak governu gasta osan lubun ida ba Dubai ho total viajen ne’ebe sira halo ne’e $130 mil resin la konta orsamentu Dubai nian konta deit viajen ne’ebe sira halo iha fulan Outubro pelumenus minimu $500,000, agora labele hetan osan ruma aluga uma ida timor oan sira nian ba maluk sira ne’e,” nia hateten iha salaun Delta Nova Comoro, Dili.

Nia hateten desizaun governu nian hasai produtu arte sira ne’e hatudu lahatene politika tanba halo baut ida ne’ebe halo governu nia naran sai aat loos hanesan uluk rejime komunista sira sunu livru no arte.

Nia hatutan fatin ne’e tenke entrega duni ba veteranus sira mak governu pelumenus ajuda grupo sira ne’e ho fatin ida ne’ebe luan no dignu ba sira atu muda sira nia produtu artistika sira, laos ba foti produtu sira ne’e soe sai hotu ba liur.

Nia informa aktu ne’e krime kontra arte tenke halo keixa ba prokuradoria no tribunal kontra governu nia asaun ida ne’e.

Iha parte seluk, Presidente Asosiasaun Arte Moris, Iliwatu Danapere hateten tempu ne’ebe governu fo ba sira loron tolu husi 1 to’o 3 atu hahamuk fatin ne’e, entau esforsu ne’ebe sira halo mak buka fatin hodi rai sira nia produtu artistika sira tanba dadau ne’e tempu udan.

Nia dehan fatin tolu ne’ebe sira hetan oferta atu uza temporariu mak Avo Ramos Horta nia residensia iha Metiaut, Xanana Reading Room Lesidere no Salaun Paroqia Dili, ne’ebe oferese husi Amo Bispo Dili Dom Virgilo da Silva do Carmo.

“Ami sempre orgulho, Avo Ramos baibain atende ami kualker tempu. Avo Nana mos prepara fatin baa mi iha Xanana Reading Room,” nia hateten.

Nia hateten importante ba sira mak protese produtu artistika sira ne’ebe dadaun ne’e rai hela iha aredores uma arte moris Comoro nian, depois hare fali ba oin tanba situasaun agora udan monu rai bele estraga hotu produtu arte sira ne’ebe sira halo tiha ona.

Nia rekonhese governu hatudu duni fatin ida ba sira iha armajen Bebora nian, maibe fatin ne’e la sufisiente no ladignu ba sira atu utiliza.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04