- Publika iha: 03 Setembro 2021
Membru Parlamentu Nasional, Deputado Joaquim do Santos hateten akompañante pasiente sira ne’ebe halo tratamentu iha hospital Bali no Jakarta, Indonesia, durante fulan tolu ona seidauk simu sira nia subsidiu ba alimentasaun.
Nia salienta kondisaun ida ne’e seriu presiza atensaun urgente husi governu tanba liga ho nesesidade bazika ema nian, liu-liu ba alimentasaun.
“Pasiente sira ne’ebe referal ba Bali no Jakarta, informa mai sira nia subsidiu fulan tolu ona seidauk simu. Ami husu governu aselera lalais sira nia osan ba nesesidade iha hospital tanba problema nesesidade bazika,” nia hateten iha plenaria parlamentu, Dili.
Nia hateten sidadaun sira ne’ebe familia moras ba halo tratamentu iha rai liur laos hotu-hotu iha kondisaun ekonomia ne’ebe diak atu bele suporta iha situasaun agora, maibe sira mos presiza alimentasaun lorloron atu bele aguenta halo tratamentu iha ema nia rai.
Iha parte seluk, Ministra da Saúde, Dra. Odete Maria Freitas Belo rekonhese servisu pagamentu subsidiu alimentasaun ba akompañante pasiente sira iha Indonesia atrazu tanba orsamentu ne’ebe alokadu menus presiza diskute fali ho ministeriu finansas atu hare orsamentu.
“Ami iha orsamentu ne’ebe menus oituan ba iha transferensia nian, entau ami tenke hare fila fali ho minsiteriu finansas. Maibe hau koalia ona ho ministru finansas katak ita laiha problema ho osan tanba ne’e hau husu ona diretur sira atu trata asuntu ida ne’e,” nia hateten.
Nia hateten sira halo esforsu atu rezolve problema sira relasiona ho subsidiu alimentasaun ne’e atu aselera transferensia ba familia pasiente iha rai liur, liu-liu iha Indonesia.
Bazea ba politika transferensia moras ba rai liur, akompañante pasiente ne’ebe halo tratamentu iha Indonesia iha direitu hetan subsidiu alimentasaun $10 loron ida. No sira ne’ebe halo tratamentu iha Singapura loron ida $25.