Quarta, Setembro 22, 2021

Governu seidauk identifika fatin ne'ebe mak seguru hodi re-aloka familia afetadu husi inundasaun fulan Abril 2021 hamutuk 271 ne'ebe mak oras ne'e dadaun kuntinua hela iha sentru evakuasaun 7 iha kapital Dili laran.

Sekretariu Estadu Protesaun Sivil (SEPS), Joaquin Gusmao Amaral, hateten governu seidauk identifika fatin ne'ebe mak seguru hodi re-aloka familia afetadu husi inundasaun fulan Abril 2021 hamutuk 271 familia.

Sekretariu Estadu Protesaun Sivil (SEPS), Joaquin Gusmao Amaral, hateten familia 271 ne'e hamutuk ho nia membru familia 1.362.

"Ita husu sira aguenta lai iha sentru akolhimentu sira. Ita nafatin apoiu ai-han no nesesidade bazika ne'ebe mak sira presija no governu nafatin identifikas fatin ne'ebe seguru hodi re-aloka sira ba," SEPS Gusmao dehan.

Nia dehan, sentro evakuasaun ne'ebe mak familia 271 okupa ne'e mak Dom Bosco, Comoro, iha familia 37, Igreja Paroquia Hera 14, Sede Suku Manleuana 41, eis restorante Metiaut 9, Rate Ain Canossa kotuk 7 no iha eis merkadu Comoro iha familia 138.

"Ita tenke buka fatin ne'ebe seguru no livre husi dezastre hodi tau sira iha ne'eba nune'e mos apoiu material konstrusaun hodi konstrui hela fatin ba familia afetadu ba inundasaun foin lalais iha dia 4 Abril liu ba," nia dehan.

Alende ne'e nia dehan, total vitima inundasaun hamutuk 30.636 ho uma ne'ebe hetan estragus total hamutuk 4.435 ne'e maioria husi Dili, husi ne'e sira ne'ebe mak simu ona apoiu rekuperasaun hamutuk 1.235 no seidauk iha 3.170.

"Agora dadaun ne'e ita hahu prepara ekipamentu rekuperasaun hodi bele kuntinua apoiu ba familia hirak ne'ebe mak seidauk simu," nia salienta.

Iha parte seluk Deputadu Mariano Asnami Sabino hateten, familia afetadu inundasaun sira ne'e okupa sentru evakuasaun ne'e kuaze fulan 5 ba 6 ona, governu tenke buka meios oinsa para bele koloka familia hirak ne'e atu bele husik fatin evakuasaun sira ne'e mamuk tanba ema nia fatin privadu.

"Ita husu governu liu-liu ministeriu relevante sira atu bele buka lalais silusaun hodi rezolve familia sira ne'e, se karik la iha ona dalan governu tenke foti desizaun hodi lori sira fila ba ida idak nia monisipiu, maibe governu tenke kria kondisaun ba sira," Deputadu Asanami dehan.

Tanba ne'e husu governu atu buka solusaun hodi rezolve vitima hirak ne'e nia problema, labele husik labarik no inan isin rua ferik katuas sira toba iha simentu leten tanba ne'e perigozu tebes ba saude liu-liu liga ba situasaun covid-19 ida agora ne'e.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04