- Publika iha: 18 Agosto 2021
Servisu Rejistrasaun no Verifikasaun Emprezarial (SERVE) aplika ona multa ho montante $5.000 ba kompanhia internasional rua tanba kontra regras.
Diretor Ezekutivu SERVE, Florenco Sanches, hateten kompanhia rua ne'e SERVE aplika multa tanba sira kontra regras hanesan muda fatin servisu la iha autorizasaun no la hetan rekonhesimentu husi SERVE.
"Ita aplika multa husi kompanhia rua ne'e hetan multa ho valor montante hanesan deit $5.000 no sansaun seluk mak durante tinan rua ita suspende sira labele kompete iha konkursu publiku sira," Diretor Ezekutivu SERVE Sanches hateten via WhatsApp.
Nia dehan, kompanhia rua ne'a mak SERVE aplika multa ne'e husi Indonesia no sira nia area servisu mak konstrusaun infrastrutura sira no durante ne'e sira hetan ona konkurzu husi estadu hoi valor 70 milhoes.
"Ita husu ba kompanhia rua ne'e tenke banati tuir no kumpri regras hanesan kompanhia Nasional no Internasional seluk ne'ebe mak eziste iha Timor-Leste," nia dehan.
Tanba ne'e husu ba kompanhia sira seluk karik hakarak atu halo mudansa ba sede servisu tenke komunika no SERVE nune'e bele iha rekonhesimentu, labele halo hanesan kompanhia internasional rua ne'e muda sede la iha rekonhesimentu no ikus mai taka mate telefone.
Entretantu, Deputadu Mariano Asanami Sabino hateten, emprezario Nasional ka Internasional ne'ebe mak nia kompanhia eziste iha Timor-Leste aktividade hotu tenke lao tuir regulamentu hotu ne'ebe mak iha nasaun ida ne'e.
"Ba kompanhia ida ne'ebe mak la kumpri no kontra regras SERVE iha kompetensia tomak hodi fo sansaun tuir tipu krimi ne'ebe mak kompanhia komete," Deputadu Asnami hateten iha Parlamentu Nasional.
Tanba ne'e ba kompanhia Nasional ka Internasional ne'ebe mak eziste iha Timor hodi halo kompetisaun ba konkursu publiku sira, karik aktividade ne'e labele halo impedimentu husi parte balun ka governu tenke kumpri regras sira ne'ebe mak regula ezistensia.