Governu Identifika Ona Familia 2.558 Okupa Area Risku Ba Dezastre Naturais

Governu liu husi Sekretariu Sekretaria Estadu Protesaun Sivil (SEPS) identifika ona familia hamutuk 2.558 mak okupa area risku ba dezastre naturais iha kapital Dili.

SEPS Joaquin Gusmao Martins hateten, familia 2.558 ne’ebe mak identifika ne’e sira kuntinua hela iha area risku ba dezastre naturis hanesan, mota ninin, foho lolon, tasi ibun, no lagoa sira.

“Area hirak ne’e ita tau ona estaka maibe komunidade sira estraga tiha estaka hodi konstrui hela fatin,” SEPS Martins hateten iha servisu fatin Caikoli Dili.

Nia dehan, area hirak ne’e risku ba dezastre naturais maibe komunidade sira la iha konsiensia no nafatin okupa, ikus mai akontese dezastre naturais, balun lakon vida depois fo sala ba governu.

“Familia 2.558 ne’ebe mak okupa area risku ba dezastre naturais iha Dili laran ne’e Sekretariu Estadu Protesaun Sivil (SEPS) no Ministeriu Justisa liu husi Diresaun Nasional Terras no Propriedade (DNTP) nune’e mos Ministeriu Obras Publiku (MOP) identifika ona rai estadu nian hodi konstrui hela fatin ba familia hirak ne’e,” nia informa.

Nia dehan, fatin ne’ebe mak governu identifika ona ne’e mak hanesan, Hera rai hetares 20, Beduku hektares 6 no Tibar hektares 6, area tolu ne’e mak governu identifika hodi kontrui uma ba familia sira ne’ebe mak hela iha area risku no sira muda ba hela iha area refere.

Entretantu, Xefe Suku Comoro, Eurico de Jesus, hateten area ne’ebe deit mak governu identifika ona hodi konstrui hela fatin ka kompleta planu urbanizasaun ne’e tenke tau komunidade iha fatin ne’ebe mak dingu.

“Ita hare iha area tolu ne’ebe mak governu mensiona ne’e mos afeta ba inundasaun hotu, ita hakarak bainhira governu muda ita nia komunidade sira ba fatin foun ne’e tenke trata sira hanesan povu ita lakoi sira terus nafatin,” Xefe Suku Comoro hateten.

Nia dehan, iha suku Comoro komunidade barak mak hela besik mota nini, foho lolon no besik lagoa sira, hahu kedan husi ponte CPLP 2,3 to’o Tasi tolu.