- Publika iha: 05 Julho 2021
Kordenador Forsa-Tarefa ba Prevensaun no Mitigasaun Surtu Covid-19, iha Timor-Leste, Doutor Rui Maria de Araújo, iha loron 30 fulan Junho tinan 2021, anunsia ba publiku katak sidadaun nain 23 maka mate ona ho Covid-19 husi 9222 kazu konfirmadu ne’ebe deteta iha rai laran.
Nia salienta kazu obitu 23 ne’e, nain 19 iha munisipio Dili, nain 3 iha munisipiu Bobonaro no nain ida iha munisipio Liquica. No sira barak sofre mos moras kronika seluk hanesan diabetes, rins failha no seluk tan.
“Husi komulativu obitu nain 23 ne’ebe iha, taxa mortalidade kazu iha Timor-Leste hanesan ho 0, 24%. Ida ne’e signifika, iha kada 1000 kazu positive, maisoumenus ema nain 2 maka hatan mate,” nia hateten liu husi komunikadu imprensa ne’ebe TDW asesu.
Nia hateten iha loron 29, relata bebe ida ho idade fulan 7 halo tratamentu iha sala izolamentu Vera Cruz, maibe lakonsege salva. Iha loron 30 sidadaun feto ida ho idade 60 ba leten lakon vida iha sala izolamentu, no sidadaun ne’e sofre mos moras diabetiku no kankru intestinu, ne’ebe hada’et ona ba orgaun vital seluk hanesan pulmaun.
Nia hatutan bebe ne’e hetan kontaktu besik husi inan no aman ne’ebe rezultado teste PCR hatudu positivu. Iha teste dahuluk rezultado negative, maibe depois mosu sintomas iha loron 25 fulan Junho, halo teste segundu rezultado hatudu positive ho Cycle Threshold (CT) N2gene 26,7, Egene 25,3. Entau medikus ira halo referral ba iha izolamentu Vera Cruz ho dignose trabalho bronchopneumonia. No iha loron 28 Junho, bebe iis kotu iha Vera Cruz ho sindroma insufisiensia respiratoria aguda ou difisil dada iis tanba Covid-19.
Nia informa iha loron 29 fulan Junho tinan 2021, izolamentu Vera Cruz halo tratamentu ba kazu detetadu nain 14, iha area obstetrisia nain 3 no iha medisina interna nain 11. Nain 3 iha obstetrisia kategoria leve no nain 10 iha medisina interna nain 3 grave ou kritiku, ne’ebe nain 1 uza ventilador no nain 2 uza oksijenu. No nain 1 kategoria moderadu no nain 7 seluk leve.
Tuir dadus jeral, iha loron 29 fulan Junho tinan 2021, total kazu foun hamutuk nain 104, kompostu husi nain 28 iha munisipiu Dili no nain 60 iha munisipio Ermera. Kazu ativu nain 839 no rekuperadu nain 54.
Iha parte seluk, Membru Parlamentu Nasional, Deputado David Dias Ximenes, preokupa ho Covid-19 variante foun ne’ebe mosu iha nasaun vizinho Indonesia tanba variante ne’e risku liu ba labarik sira.
“Variante ida fali agora mosu iha Indonesia ne’eba labarik deit maka mate. Agora ita husu eskola sira tenke lao, ita preokupa ho ita nia oan sira nia edukasaun, maibe ita tenke preokupa uluk ho sira nia vida,” nia hateten.
Nia dehan iha Timor, ema barak sofre moras kurasaun, maibe ita seidauk iha kapasidade atu fo atendimentu ba iha ema sira ne’e tantu tratamentu no diagnose, entau governu presiza hare ona fasilidade no ekipamentu ba area ida ne’e tanba mediku espesialista Timoroan iha atu halo karterizasaun hodi observa kurasaun.