Governu Identifika Ona Uma 1.785 Atu Hetan Apoiu Rekoperasaun

Governu liu husi Sekretariu Estadu Protesaun Sivil (SEPS) dentifika ona uma komunidade nian hamutuk 1.785 kategoria tama iha apoiu rekoperasaun tanba hetan estragus total husi inundasaun ne’ebe akontese iha kapital Dili.

Diretor Geral Protesaun Sivil Daniel Babo hateten, inundasaun ne'ebe akontese iha dia 4 abril ho estragus uma komunidade nian iha Dili nune’e mos munisipiu seluk ne’ebe mak afetadu.

“Iha kapita Dili uma ne’ebe hetan esragus total hamutuk 1.785 no uma hirak ne’e tama ona iha kategoria apoiu rekuperasaun,” DG SEPS Babo hateten.

Nia dehan, uma hirak ne’ebe governu identifika ne’e iha kapital Dili nia deit seidauk rekolha husi munisipiu afetadu sira seluk.

“Uma 1.785 ne'ebe ita identifika ona ne’e ita apoiu emergensia hotu ona hein deit apoiu rekuperasaun nian,” nia salienta.

Nia dehan apoiu rekuperasaun ne’e fahe ba parte ruma apoiu material kontrusaun no mao de obra tuir medida uma komunidade nian ne’ebe hetan estragus.

“Uma 1.785 ne'e identifika iha munisipiu Dili deit no munisipiu afetadu seluk seidauk, maibe Sekretariu Estadu Protesaun Sivil nafatin komunika ho ekipa dezastre naturais ne'ebe destaka iha munisipiu hodi kuntinua foti dados uma estragus total nian.

Nia informa tan katak, apoiu rekuperasaun ne'e governu sei halo iha tempo badak tanba tuir dados ne’ebe aprezenta ona iha konselhu ministrus no hetan ona aprovasaun.

Tanba ne'e, komunidade sira ne'ebe mak uma hetan estagus total ne'e husu pasiensia oituan no governu sei rezolve iha tempu besik.

Entretantu, Xefe Suku Comoro Eurco de Jesus hateten, komunidade ne'ebe mak hela fatin estragus total iha Comoro hamutuk 137 oras ne'e dadaun sira kuntinua hela iha sentru evakuasaun.

"Ita nia komunidade uma kain 137 ne'e kuntinua okupa sentro evakuasaun Dom Bosco Comoro no balun hela iha tenda ne'ebe mak ita nia governu ofrese ona iha area Maslindu nian," Xefe Suku Comoro Jesus dehan.

Tanba ne’e husu governu konaba politika rekoperasaun hela fatin komunidade nian ne'ebe hetan estragus tenke rezolve lalais nune'e komunidade sira bele husik ona fatin evakuasaun sira.

“Ita hare komunidade sira ne’e ita laran susar los liu-liu bebe sira tenke toba iha rai, udan rai rahun, tanba ne’e ita husu obrigatoriu governu tenke rezolve lalais hela fatin komunidade nian,” Xefe Suku Salienta.