PNTL Hasai Negosiante Sira Negosio Iha Fatin Publiku

Polisia Nasional Timor-Leste (PNTL) halo intervensaun hodi hasai negosiente ambulante sira ne’ebe okupa estrada publiku hodi halo negosio.

Komandante Jeral PNTL, Komisario Faustinho da Costa, hateten negosiante ambulante sira ne’ebe mak faan sasan baziku iha estrada publiku ne’e risku bo’ot ba asidente.

“Ita hare iha estrada publiku sira iha Dili laran, kuaze okupa husi negosiante ambulante sira no hatudu imagem sidade Dili ladun diak,” Komisario PNTL Costa dehan.

Nia dehan, hanesan iha area Kampung Baru, Rotunda Nicolau Lobatu, Comoro, Ponte Bekora, Delta Elemloi ne’e maioria negosiante ambulante sira okupa hotu.

“Tanba ne’e Polisia Nasional Timor-Leste (PNTL) halo intervensaun hodi hasai negosiante ambulante sira ne’ebe okupa estrada publiku hodi faan nesesidade bazika no haruka sira ba faan iha ida-ida nian uma,” nia hateten.

Nia dehan, maluk negosiante ambulante sira ne’e, iha uma kios oan iha hela, maibe sira nafatin hasai sira sasan tau iha grobak hodi ba faan iha fatin publiku.

“Ita nia ekipa Jestaun Merkado no polisia kuntinua halo operasaun ho duni sai negosiante sira, komunidade sira hakarak buka moris maibe tenke kumpri regras atu nune’e polisia labele halo intervensaun,” nia salienta.

Tanba ne’e husu, kolaborasaun negosante sira nian atu nune’e polisia labele uza forsa hodi foti sira nia sasan.

Entretanto, negosiante Maia do Rosario hateten, sasan sira ne’ebe mak nia faan hanesan be’e, rabisado no sigaru, biskuat iha grobak iha dalan publiku ne’e tanba nia faan iha uma kuaze sasan sira ne’e la folin.

“Ami hela iha Dili buka moris husi faan nesesidade baziku oan sira ne’e, iha uma la folin, ne’e mak ami iha hanoin uza fali tiga roda hodi faan iha fatin publiku atu nune’e ami nia sasan bele folin no kada loron ami bele hetan to’o $20 dala ruma lae liu,” negosiante Rosario hateten.

Alende ne’e nia dehan, antes nia uza grobak hodi faan sasan iha fatin publiku nia hatene katak kontra regras, maibe atu halo tan nusa tanba rezultado ne’ebe hetan husi grobak ne’e mak hodi sustenta familia no haruka oan ba eskola.